വീട്ടുകാര്‍ പുറത്തും തെരുവുനായ അകത്തും

കോഴിക്കോട് പാറോപ്പടിയിലെ ഡൊമിനികിനും കുടുംബത്തിനുമാണ് ഇങ്ങനെ ഒരു ദുരവസ്ഥയുണ്ടായത്

വീട്ടുകാര്‍ പുറത്തും തെരുവുനായ അകത്തും. കോഴിക്കോട് പാറോപ്പടിയിലെ ഡൊമിനികിനും കുടുംബത്തിനുമാണ് ഇങ്ങനെ ഒരു ദുരവസ്ഥയുണ്ടായത്. ഇന്ന് രാവിലെയാണ് തെരുവുനായ ഡൊമിനികിന്‍റെ വീട്ടില്‍ കയറി കൂടിയത്.

പാറോപ്പടിയിലെ എം ഡി ഡൊമിനികിന്‍റെ വീട്ടിനകത്തേക്കാണ് പുറക് വശത്തെ വാതിലിലൂടെ തെരുവുനായ ഓടികയറിയത്. നായയെ കണ്ടതോടെ കുട്ടികളും സ്ത്രീകളും പേടിച്ച് പുറത്തേക്കിറങ്ങി. വീട്ടുകാര്‍ എത്ര ശ്രമിച്ചിട്ടും നായയെ പുറത്തിറക്കാന്‍ കഴിഞ്ഞില്ല. മുറിയിലെ സാധനങ്ങളെല്ലാം നശിപ്പിച്ച നായയെ അകത്ത് പൂട്ടിയിട്ടു. പിന്നീട് നായ അകത്തും വീട്ടുകാര്‍ പുറത്തുമെന്ന അവസ്ഥയായി.

തെരുവുനായ ശല്യം പ്രദേശത്ത് രൂക്ഷമാണെന്ന് ഇവര്‍ പറയുന്നു. പട്ടി പിടുത്തക്കാര്‍ എത്തി നായയെ കൊണ്ടുപോയതിന് ശേഷമാണ് ഇവര്‍ക്ക് വീട്ടിനകത്ത് കയറാനായത്.