'കേരളത്തിലെ പ്രതിപക്ഷം ലോകത്തിന് മാതൃക'; സർക്കാരിന് പിന്തുണ അറിയിച്ച പ്രതിപക്ഷ നേതാവിനെ അഭിനന്ദിച്ച് നടൻ ജോയ്​ മാത്യൂ

കോവിഡ് പ്രതിരോധത്തിൽ സർക്കാരിന് പൂർണ പിന്തുണ അറിയിച്ച പ്രതിപക്ഷ നേതാവ്​ രമേശ്​ ചെന്നിത്തലക്ക്​ അഭിനന്ദനവുമായി നടൻ ജോയ്​ മാത്യൂ. ജനജീവിതം കൊടും ദുരിതത്തിലേക്ക്​ കൂപ്പുകു​ത്തുമ്പോൾ സംസ്ഥാന സർക്കാർ കൈകൊള്ളുന്ന ജനരക്ഷക്ക്​ സർവ പിന്തുണയും നൽകാൻ തയ്യാറായ പ്രതിപക്ഷത്തിനെ അഭിനന്ദിക്കാതിരിക്കാൻ വയ്യെന്ന്​ ജോയ്​ മാത്യൂ പറഞ്ഞു.

രാഷ്ട്രീയ ലാഭങ്ങൾ മാറ്റിവെച്ച് ജനങ്ങൾക്ക് വേണ്ടി നിലകൊള്ളുന്ന കേരളത്തിലെ പ്രതിപക്ഷം അങ്ങനെ ലോകത്തിനു മാതൃകയാവുന്നുവെന്നും ഇങ്ങിനെയായിരിക്കണം പ്രതിപക്ഷമെന്നും ജോയ്​ മാത്യൂ ഫേസ്​ബുക്കിൽ കുറിച്ചു.

ഫേസ്​ബുക്ക് പോസ്റ്റിന്റെ പൂർണരൂപം;

ഒരിക്കൽ കൂടി പ്രതിപക്ഷ നേതാവ് ശ്രീ രമേശ് ചെന്നിത്തലക്ക് അഭിനന്ദനം.രാജ്യം കോവിഡ് ഭീതിയിൽ വിറങ്ങലിക്കുകയും രോഗ പ്രതിരോധത്തിനു ആവശ്യമായ വാക്‌സിനുകളുടെയും ഓക്സിജന്‍റെയും ദൗർലഭ്യം കാരണം ജനജീവിതം കൊടും ദുരിതത്തിലേക്ക് കൂപ്പുകുത്തുകയും ചെയ്യുമ്പോൾ സംസ്ഥാന ഗവൺമെന്‍റ്​ കൈക്കൊള്ളുന്ന ജനരക്ഷക്ക് സർവ്വ പിന്തുണയും നൽകാൻ തയ്യാറായ പ്രതിപക്ഷത്തിനെ അഭിനന്ദിക്കാതിരിക്കാൻ വയ്യ. ഈ ദുരിതകാലം മറികടക്കുവാൻ രാഷ്ട്രീയ ലാഭങ്ങൾ മാറ്റിവെച്ച് ജനങ്ങൾക്ക് വേണ്ടി നിലകൊള്ളുന്ന കേരളത്തിലെ പ്രതിപക്ഷം അങ്ങനെ ലോകത്തിനു മാതൃകയാവുന്നു. അഭിനന്ദനങ്ങൾ, ഇതായിരിക്കണം പ്രതിപക്ഷം, ഇങ്ങിനെയായിരിക്കണം പ്രതിപക്ഷം.