ഒടുവില്‍ കുഞ്ഞ് പെറ്റമ്മയുടെ കരങ്ങളില്‍; അനുപമയുടെ പോരാട്ടത്തിന്‍റെ നാള്‍വഴി

അമ്മയറിയാതെ ദത്തു നല്‍കിയ കേസില്‍ കുടുംബ കോടതിയുടെ ഇടപെടലോടെ കുഞ്ഞ് പെറ്റമ്മയുടെ കരങ്ങളിലെത്തി. ഇനി അവന് അമ്മയുടെ തണല്‍. അനുപമ കുഞ്ഞിനെ തിരികെ നേടിയത് ഒരു വര്‍ഷത്തെ പോരാട്ടത്തിനൊടുവിലാണ്. കേസിന്‍റെ നാള്‍വഴിയിങ്ങനെ...  

2020 ഒക്ടോബർ 19- കാട്ടാക്കടയിലെ ആശുപത്രിയിൽ അനുപമ ആൺകുഞ്ഞിനു ജന്മം നൽകി

ഒക്ടോബർ 22- അനുപമയുടെ കുഞ്ഞിനെ മാതാപിതാക്കൾ ശിശുക്ഷേമ സമിതിക്കു കൈമാറി. ലഭിച്ചത് ആണ്‍കുഞ്ഞാണെങ്കിലും പെണ്‍കുഞ്ഞിനെ അമ്മത്തൊട്ടിലില്‍ ലഭിച്ചെന്നും മലാല എന്ന പേരിട്ടെന്നുമായിരുന്നു സമിതിയുടെ അടുത്ത ദിവസത്തെ പത്രക്കുറിപ്പ്

2021 ജനുവരി- അജിത് കുമാ‍ർ ആദ്യ ഭാര്യയിൽ നിന്നു വിവാഹമോചനം നേടി

ഫെബ്രുവരി- അനുപമയുടെ സഹോദരിയുടെ വിവാഹം

മാർച്ച്- അജിത്തും അനുപമയും ഒരുമിച്ചു താമസിക്കുന്നു

ഏപ്രിൽ 19- കുഞ്ഞിനെ കണ്ടെത്തി നൽകണമെന്ന പരാതിയുമായി അനുപമ പേരൂർക്കട പൊലീസ് സ്റ്റേഷനിലെത്തി

ഏപ്രിൽ- ചൈൽഡ് വെൽഫെയർ കമ്മിറ്റിയില്‍ പരാതി നല്‍കി

ഏപ്രിൽ 29- അനുപമ ഡിജിപിക്ക് പരാതി നല്‍കി

മെയ്- പേരൂർക്കട പൊലീസ് അനുപമയുടെ മൊഴി രേഖപ്പെടുത്തി

ആഗസ്ത് 7- ആന്ധ്ര ദമ്പതികൾക്കു താൽക്കാലികമായി കുഞ്ഞിനെ ദത്തു നൽകാൻ അഞ്ചംഗ ദത്തു നൽകൽ സമിതി തീരുമാനിച്ചു

ആഗസ്ത് 11- കുഞ്ഞിനെ തിരക്കി അനുപമ ശിശുക്ഷേമ സമിതിയിലെത്തി. കണ്ടതു മറ്റൊരു കുഞ്ഞിനെ. ഡിഎൻഎ പരിശോധന നടത്താൻ സിഡബ്ല്യുസിക്ക് അപേക്ഷ നൽകി

സെപ്തംബര്‍ 30- ഡിഎൻഎ പരിശോധന

ഒക്ടോബർ 7- സമിതിയിൽ കണ്ട കുഞ്ഞ് അനുപമയുടേതല്ലെന്നു പരിശോധനാ ഫലം

ഒക്ടോബർ 15- നടന്ന സംഭവങ്ങള്‍ അനുപമ മാധ്യമങ്ങളോട് വിശദീകരിച്ചു

ഒക്ടോബർ 18- പൊലീസ് കേസ് രജിസ്റ്റർ ചെയ്തു

ഒക്ടോബർ 21- വനിതാ കമ്മിഷൻ കേസെടുത്തു

നവംബർ 11- അനുപമയും അജിത്തും ശിശുക്ഷേമ സമിതി ഓഫിസിനു മുൻപിൽ അനിശ്ചിതകാല സത്യഗ്രഹം തുടങ്ങി

നവംബർ 18- കുഞ്ഞിനെ ഡിഎൻഎ പരിശോധനയ്ക്കായി ആന്ധ്ര പ്രദേശിൽ നിന്നു കേരളത്തിലെത്തിക്കാൻ ചൈൽഡ് വെൽഫെയർ കമ്മിറ്റി ഉത്തരവിട്ടു

നവംബർ 21- ദത്ത് നൽകിയ കുഞ്ഞിനെ ആന്ധ്രപ്രദേശില്‍ നിന്ന് തിരികെയെത്തിച്ചു

നവംബർ 22- ഡിഎൻഎ പരിശോധനയ്ക്കായി കുഞ്ഞിന്‍റെയും അനുപമയുടെയും അജിത്തിന്‍റെയും സാമ്പിള്‍ ശേഖരിച്ചു.

നവംബർ 23- കുഞ്ഞിന്റെ മാതാവ് അനുപമയെന്ന് ഡിഎൻഎ പരിശോധനാഫലം

നവംബർ 24- വഞ്ചിയൂര്‍ കുടുംബകോടതി കുഞ്ഞിനെ അനുപമയ്ക്കു കൈമാറി