'പിണറായി-സുധാകരൻ സംഘട്ടനത്തെക്കുറിച്ച് തനിക്കൊന്നുമറിയില്ല'; മമ്പറം ദിവാകരൻ
'സംഘടനാ കോൺഗ്രസിലായിരുന്ന കെ.സുധാകരൻ അന്ന് കെ.എസ്.യു വിരുദ്ധനായിരുന്നു'
Update: 2021-06-18 16:55 GMT
മുഖ്യമന്ത്രി പിണറായി വിജയനും കെ.പി.സി.സി പ്രസിഡന്റ് കെ.സുധാകരനും തമ്മിൽ ബ്രണ്ണൻ കോളജ് പഠനകാലത്ത് നടന്നുവെന്ന് പറയുന്ന സംഘട്ടനത്തെക്കുറിച്ച് തനിക്കൊന്നുമറിയില്ലെന്ന് കോൺഗ്രസ് നേതാവ് മമ്പറം ദിവാകരൻ. മീഡിയവൺ സ്പെഷ്യൽ എഡിഷനിലായിരുന്നു മമ്പറം ദിവാകരന്റെ പ്രതികരണം.
1971ലാണ് താൻ ബ്രണ്ണനിൽ പഠിക്കാനെത്തുന്നത്. അന്ന് സുധാകരനും ഒന്നിച്ചുണ്ടായിരുന്നു. ഞങ്ങളുടെ സീനിയർ ആയിരുന്നു പിണറായി വിജയൻ. അന്ന് കോൺഗ്രസിൽ രണ്ടു വിഭാഗങ്ങളുണ്ടായിരുന്നു. ഇന്ദിരാ കോൺഗ്രസിനൊപ്പമായിരുന്നു ഞാൻ. സംഘടനാ കോൺഗ്രസിലായിരുന്ന കെ.സുധാകരൻ അന്ന് കെ.എസ്.യു വിരുദ്ധനായിരുന്നു.
പിണറായി വിജയൻ ബ്രണ്ണൻ കോളജിൽ വന്നപ്പോൾ ചവിട്ടിവീഴ്ത്തിയെന്ന് കെ.സുധാകരൻ പറയുന്ന സംഭവത്തെക്കുറിച്ച് ബ്രണ്ണനിലെ പഠനകാലത്ത് ആരും പറഞ്ഞുകേട്ടിട്ടില്ല. അന്ന് ഞങ്ങളും ഇടതുപക്ഷവും തമ്മിൽ നിരവധി സംഘട്ടനം ഉണ്ടായിട്ടുണ്ട്. മുൻമന്ത്രി എ.കെ. ബാലനായിരുന്നു അന്ന് ഇടതുവിദ്യാർഥി സംഘടനയുടെ നേതാവ്.
പിണറായി വിജയന്റെ മക്കളെ തട്ടിക്കൊണ്ടുപോകാൻ കെ. സുധാകരൻ പദ്ധതിയിട്ടുവെന്ന മുഖ്യമന്ത്രി പിണറായി വിജയന്റെ വെളിപ്പെടുത്തൽ പുതിയ അറിവാണെന്നും അതേക്കുറിച്ച് പണ്ടും ഇപ്പോഴും ആരും പറഞ്ഞുകേട്ടിട്ടില്ലെന്നും മമ്പറം ദിവാകരൻ പറഞ്ഞു.