വിസ്മയയെ അഞ്ചുതവണ മർദിച്ചിരുന്നതായി കിരൺ

കൊല്ലത്ത് ദുരൂഹസാഹചര്യത്തിൽ മരിച്ച വിസ്മയയെ അഞ്ചുതവണ മർദിച്ചിരുന്നതായി ഭർത്താവ് കിരണിന്റെ മൊഴി. എന്നാൽ വിസ്മയയെ മരിച്ച നിലയിൽ കണ്ട ദിവസം മർദിച്ചിട്ടില്ലെന്നും കിരൺ പറഞ്ഞു. പൊലീസിന്റെ ചോദ്യങ്ങളോട് നിർവികാരമായിട്ടായിരുന്നു കിരണിന്റെ പ്രതികരണം.

മദ്യപിച്ചാൽ കിരൺ കുമാറിന്റെ സ്വഭാവത്തിനുണ്ടാകുന്ന മാറ്റത്തെ കുറിച്ച് അറിയുന്നതിന് പൊലീസ് മനശാസ്ത്രജ്ഞരുടെ അഭിപ്രായം തേടി.വിസ്മയയുടെ സ്വർണാഭരണങ്ങൾ സൂക്ഷിച്ചിരിക്കുന്ന ബാങ്ക് ലോക്കറിൽ കിരണുമായി തെളിവെടുപ്പ് നടക്കുകയാണ്.

കൊല്ലത്തെ വിസ്മയയുടെ ദുരൂഹമരണക്കേസിൽ നിലമേലിലെ വിസ്മയയുടെ വീട് ഇന്നലെ ഗവർണർ ആരിഫ് മുഹമ്മദ് ഖാൻ സന്ദർശിച്ചു. കുടുംബവുമായി ഗവർണർ ഏറെനേരം സംസാരിച്ചു. സ്ത്രീധനം ആവശ്യപ്പെടുന്ന പുരുഷന്മാരുമായി വിവാഹബന്ധം വേണ്ടെന്ന് വെയ്ക്കാൻ പെൺകുട്ടികൾ തയാറാകണമെന്ന് ഗവർണർ പറഞ്ഞു. എല്ലാകാര്യത്തിലും മുന്നിലായ കേരളം ഇതുപോലെയുള്ള ചിലകാര്യങ്ങളിലാണ് പിറകിലെന്നും സ്ത്രീധനത്തിനെതിരേ ബോധവത്കരണം വേണമെന്നും അദ്ദേഹം ആവശ്യപ്പെട്ടു.