'ശബരിമലയിൽ സ്പോട്ട് ബുക്കിങ്ങ് വേണം': എം.വി ഗോവിന്ദൻ
'പാര്‍ട്ടിക്ക് ഒരു അഭിപ്രായ വ്യത്യാസവുമില്ല'
Update: 2024-10-14 15:00 GMT
തിരുവനന്തപുരം: ശബരിമലയിൽ സ്പോട്ട് ബുക്കിങ്ങ് വേണമെന്ന് സിപിഎം സംസ്ഥാന സെക്രട്ടറി എം.വി ഗോവിന്ദൻ. നിലവിൽ 80000 ആണ് വെർച്വൽ ക്യൂവിൽ നിജപ്പെടുത്തിയിരിക്കുന്ന എണ്ണം. പതിനായിരമോ പതിനയ്യായിരമോ അല്ലാതെയും വേണ്ടി വരും. അല്ലെങ്കിൽ തിരക്കിലേക്കും സംഘർഷത്തിലേക്കും വഴിവെക്കുമെന്നും എം.വി ഗോവിന്ദൻ പറഞ്ഞു. ഇത് വർഗീയവാദികൾക്ക് മുതലെടുക്കാനുള്ള അവസരമാകുമെന്നും അദ്ദേഹം പറഞ്ഞു.
ഇന്ന് വൈകുന്നേരം ഒരു പരിപാടിയിൽ പങ്കെടുക്കവെയാണ് എം.വി ഗോവിന്ദൻ ഇക്കാര്യം പറഞ്ഞത്. 'ശബരിമല ആരുടെയും കുത്തകയല്ല. നല്ലൊരു വിഭാഗം സിപിഎമ്മുകാർ ശബരിമലയിൽ പോകുന്നുണ്ടെ'ന്നും അദ്ദേഹം കൂട്ടിച്ചേർത്തു. 'ശബരിമലയിലേക്ക് വരുന്ന മുഴുവന്‍ ഭക്തർക്കും കൃത്യമായ ക്രമീകരണത്തോടെ ദര്‍ശനം അനുവദിക്കണം. കൃത്യമായി സന്നിധിയിലേക്ക് പോകാനും സൗകര്യം ഉണ്ടാകണം. ഇക്കാര്യത്തില്‍ പാര്‍ട്ടിക്ക് ഒരു അഭിപ്രായ വ്യത്യാസവും ഇല്ല.'- അദ്ദേഹം കൂട്ടിച്ചേർത്തു.