ക്രിസ്‌തുവിന്റെ ഉയിർപ്പിന്‍റെ ഓർമ്മ പുതുക്കി നാടെങ്ങും ഈസ്‌റ്റർ ആഘോഷം

കോഴിക്കോട്: യേശു ക്രിസ്തുവിന്റെ ഉയിർത്തെഴുന്നേൽപ്പിനെ അനുസ്മരിച്ച് ക്രൈസ്തവർ ഈസ്റ്റർ ആഘോഷിക്കുകയാണ്. ദേവാലയങ്ങളിൽ പാതിരാ കുർബാനയും ഉയിർപ്പ് ശുശ്രൂഷകളും നടന്നു. തിരുവനന്തപുരം പട്ടം സെന്റ് മേരീസ് കത്തീഡ്രലിൽ രാത്രി പ്രാർഥനകൾക്ക് മലങ്കര കത്തോലിക്കാസഭ അധ്യക്ഷൻ കർദിനാൾ മാർ ബസേലിയോസ് ക്ലീമിസ് കാതോലിക്കാ ബാവ മുഖ്യകാർമികത്വം വഹിച്ചു.

തിരുവനന്തപുരം പാളയം സെൻറ് ജോസഫ് മെട്രോ പൊളിറ്റൻ കത്തീഡ്രലിൽ ഉയിർപ്പ് ശുശ്രൂഷകൾക്ക് ലത്തീൻ അതിരൂപത ആർച്ച് ബിഷപ്പ് ഡോ.തോമസ് ജെ നെറ്റോ നേതൃത്വം നൽകി.

എറണാകുളം തിരുവാങ്കുളം സെന്റ് ജോർജ് ദേവാലയത്തിൽ സീറോ മലബാർ സഭ മേജർ ആർച്ച് ബിഷപ്പ് മാർ റാഫേൽ തട്ടിൽ തിരുകർമ്മങ്ങൾക്ക് നേതൃത്വം വഹിച്ചു.

കോഴിക്കോട് മേരി മാതാ കത്തീഡ്രലിൽ കോഴിക്കോട് അതിരൂപതാ ആർച്ച് ബിഷപ്പ് ഡോ.വർഗീസ് ചക്കാലക്കൽ മുഖ്യ കാർമ്മികത്വം വഹിച്ചു.മുനമ്പം കേസ് പരിഹരിക്കാൻ കുറെ ആളുകളുണ്ടെന്നും,സന്മനസുകളുടെ പ്രവർത്തനം മൂലം അത് പരിഹരിക്കപ്പെടുമെന്നും ആർച്ച് ബിഷപ്പ് പറഞ്ഞു.