വണ്ടിപ്പെരിയാറിലെ കുട്ടിയുടെ പിതാവിനെതിരായ ആക്രമണം; പ്രതി പാൽ രാജിന്റെ അറസ്റ്റ് രേഖപ്പെടുത്തി

ഇടുക്കി: വണ്ടിപ്പെരിയാറിൽ ക്രൂര പീഡനത്തിനിരയായി കൊല്ലപ്പെട്ട ആറ് വയസുകാരിയുടെ പിതാവിനെ ആക്രമിച്ച കേസിൽ പ്രതി പാൽ രാജിന്റെ അറസ്റ്റ് രേഖപ്പെടുത്തി.. വധശ്രമം ഉൾപ്പെടെയുള്ള വകുപ്പുകളാണ് പ്രതിക്കെതിരെ ചുമത്തിയിരിക്കുന്നത്. ആക്രമണത്തിന്റെ പശ്ചാത്തലത്തിൽ പെൺകുട്ടിയുടെ കുടുംബത്തിന് സുരക്ഷ ഉറപ്പാക്കുമെന്ന് പോലീസ് അറിയിച്ചു.

ഇന്നലെയാണ് വണ്ടിപ്പെരിയാറിൽ വെച്ച് പെൺകുട്ടിയുടെ പിതാവിനെ, കേസിൽ കുറ്റവിമുക്തനാക്കിയ അർജുന്റെ ബന്ധു പാൽ രാജ് ആക്രമിച്ചത്. പെൺകുട്ടിയുടെ പിതാവും മുത്തച്ഛനും സാരമായി പരിക്കേറ്റ് കോട്ടയം മെഡിക്കൽ കോളേജിൽ ചികിൽസയിലാണ്. പ്രകോപനം ഉണ്ടാക്കിയത് പാൽരാജ് ആണെന്നാണ് എഫ്‌ഐആർ. കുട്ടിയുടെ പിതാവിനെ കൊല്ലണമെന്ന ഉദ്ദേശത്തോടെയായിരുന്നു ആക്രമണം.

പെൺകുട്ടിയുടെ കുടുംബത്തിന് നീതി ഉറപ്പാക്കണം എന്ന് ആവശ്യവുമായി വണ്ടിപ്പെരിയാറിൽ കോൺഗ്രസ് ഇന്ന് സ്ത്രീജ്വാല പ്രതിഷേധ പരിപാടി നടത്തും. വൈകിട്ട് 3ന് ബഹുജന റാലിയക്ക് ശേഷം നടക്കുന്ന പൊതുസമ്മേളനം എ.ഐ.സി.സി ജനറൽ സെക്രട്ടറി കെ.സി വേണുഗോപാൽ എം.പി ഉദ്ഘാടനം ചെയ്യും. എ.ഐ.സി.സി.ജനറൽ സെക്രട്ടി ദീപാ ദാസ് മുൻഷി ,പ്രതിപക്ഷ നേതാവ് വി.ഡി. സതീശൻ ഉൾപ്പെടെയുള്ളവർ പങ്കെടുക്കും.