5 വയസിൽ താഴെയുള്ള കുട്ടികളുടെ അമ്മമാർക്ക് വാക്​സിനേഷന് മുൻഗണ നൽകി ആന്ധ്രാപ്രദേശ്

കോവിഡ് വാക്സിനേഷൻ മുൻഗനണനാ വിഭാഗത്തിൽ അഞ്ച് വയസിന്​ താഴെ പ്രായമുള്ള കുട്ടികളുടെ അമ്മമാരേയും ഉൾപ്പെടുത്തി ആന്ധ്രാപ്രദേശ്​ സർക്കാർ. അത്തരത്തിൽ 20 ലക്ഷത്തോളം അമ്മമാരാണ്​ സംസ്ഥാനത്തുള്ളത്​. 45 വയസിനു മുകളിൽ പ്രായമുള്ളവർക്കൊപ്പമാകും ഇവർക്ക്​ കുത്തിവെപ്പ്​ നടത്തുക.

കോവിഡ് ബാധിച്ച കുട്ടികൾക്കൊപ്പം അവരുടെ അമ്മമാരും ആശുപത്രികളിൽ കഴിയണമെന്ന് കോവിഡ് അവലോകന യോഗം തീരുമാനിച്ചിരുന്നു. ഈ സാഹചര്യത്തിലാണ്​ തീരുമാനമെന്ന്​ മുഖ്യമന്ത്രി വൈ.എസ് ജഗൻ മോഹൻ റെഡി പറഞ്ഞു.

മൂന്നാം തരംഗത്തിനെതിരെ പ്രതിരോധ നടപടികൾ ഊർജിതമാക്കാൻ സംസ്ഥാനം പദ്ധതികൾ ആവിഷ്​കരിച്ചിട്ടുണ്ട്​. മൂന്നാം തരംഗത്തിൽ കുട്ടികൾക്ക്​ കൂടുതൽ പരിഗണന നൽകാനാണ് സർക്കാർ തീരുമാനമെടുത്തിരിക്കുന്നത്. ഇതിന്റെ ഭാഗമായി ഐ.സി.യു, പീഡിയാട്രിക് കിടക്കകൾ, വെൻറിലേറ്ററുകൾ, കുട്ടികൾക്കുള്ള മരുന്നുകൾ, മാസ്​കുകൾ, കുട്ടികളെ ചികിത്സിക്കാനുള്ള മറ്റ്​ സംവിധാനങ്ങൾ എന്നിവ ഉറപ്പാക്കുന്നതിന്​ കൂടുതൽ പരിഗണന നൽകാനും തീരുമാനിച്ചു.

എല്ലാ ആശുപത്രികളിലും പീഡിയാട്രിക് വാർഡുകൾ സ്ഥാപിക്കും. പ്രാഥമികാരോഗ്യ കേന്ദ്രങ്ങളിലടക്കം കുട്ടികളെ ചികിത്സിക്കാനുള്ള നടപടികൾ സ്വീകരിക്കും. ആവശ്യാനുസരണം ശിശുരോഗവിദഗ്​ധരെ നിയമിക്കുമെന്നും മുഖ്യമന്ത്രി പറഞ്ഞു.