ഇന്ത്യയുടെ ഫിസിയോവിനെ ഓസീസ് അപമാനിച്ചതായി കൊഹ്‍ലി
Update: 2017-08-04 11:45 GMT
തോളിന് പരിക്കേറ്റ കൊഹ്‍ലിയെ തിരികെ കളത്തിലെത്തിക്കാന്‍ ഫര്‍ഹാര്‍ത്ത് ചെറുതല്ലാത്ത പങ്കാണ് വഹിച്ചിട്ടുള്ളത്. അതിന് അദ്ദേഹം അഭിനന്ദനം അര്‍ഹിക്കുന്നുവെന്നും സ്മിത്ത്
ടീം ഇന്ത്യയുടെ ഫിസിയോവും ആസ്ത്രേലിയന്‍ വംശജനുമായ പാട്രിക് ഫര്‍ഹാര്‍ത്തിനെ ചില ഓസീസ് താരങ്ങള്‍ അപമാനിച്ചതായി ഇന്ത്യന്‍ നായകന്‍ വിരാട് കൊഹ്‍ലി. പരിക്കിനെ തുടര്‍ന്ന് തന്നെ ചികിത്സിക്കാനായി ഫര്‍ഹാര്‍ത്ത് ഗ്രൌണ്ടിലെത്തിയതിന് ശേഷം നാലഞ്ച് ഓസീസ് താരങ്ങള്‍ ചേര്‍ന്ന് അനാവശ്യമായി ഫിസിയോവുടെ പേര് തങ്ങളുടെ സംസാരങ്ങളില്‍ കൊണ്ടുവരാന്‍ തുടങ്ങിയെന്നാണ് കൊഹ്‍ലിയുടെ ആരോപണം. എന്തുകൊണ്ടാണ് അവരത് ചെയ്തതെന്ന് എനിക്കറിയില്ല. അദ്ദേഹം ഞങ്ങളുടെ ഫിസിയോവാണ്. എന്നെ ചികിത്സിക്കുന്നത് അദ്ദേഹത്തിന്‍റെ ജോലിയുടെ ഭാഗവും. അവരുടെ പ്രവൃത്തിയുടെ പിന്നിലെ ഉദ്ദേശം എനിക്ക് മനസിലായില്ല. എന്തിനാണ് ഫര്‍ഹാര്‍ത്തിന്‍റെ പേര് ഉപയോഗിച്ച് തുടങ്ങിയതെന്ന് അവര്‍ തന്നെ വ്യക്തമാക്കണം - കൊഹ്‍ലി കുറ്റപ്പെടുത്തി.
എന്നാല്‍ കൊഹ്‍ലിയുടെ ആരോപണം നിരാശാജനകമാണെന്നായിരുന്നു ആസ്ത്രേലിയന്‍ നായകന്‍ സ്റ്റീവന്‍ സ്മിത്തിന്‍റെ പ്രതികരണം. തോളിന് പരിക്കേറ്റ കൊഹ്‍ലിയെ തിരികെ കളത്തിലെത്തിക്കാന്‍ ഫര്‍ഹാര്‍ത്ത് ചെറുതല്ലാത്ത പങ്കാണ് വഹിച്ചിട്ടുള്ളത്. അതിന് അദ്ദേഹം അഭിനന്ദനം അര്‍ഹിക്കുന്നുവെന്നും സ്മിത്ത് കൂട്ടിച്ചേര്‍ത്തു.