പെപ് എങ്ങും പോവില്ല; മാഞ്ചസ്റ്റര്‍ സിറ്റിയുമായുള്ള കരാര്‍ ഒരു വര്‍ഷത്തേക്ക് കൂടി നീട്ടി

ഇഗ്ലീഷ് പ്രീമിയർ ലീഗ് വമ്പന്മാരായ മാഞ്ചസ്റ്റർ സിറ്റിയുമായുള്ള കരാർ ഒരു വർഷത്തേക്ക് കൂടി നീട്ടി പെപ് ഗാർഡിയോള. 2026 സമ്മർ വരെ സ്പാനിഷ് പരിശീലകൻ സിറ്റിയിൽ തുടരുമെന്ന് ക്ലബ്ബ് മാനേജ്‌മെന്റ് അറിയിച്ചു. നേരത്തേ ക്ലബ്ബിന്റെ സ്‌പോർട്ടിങ് ഡയറക്ടറായിരുന്ന ടികി ബെഗിരിസ്റ്റൈൻ ടീം വിട്ടതോടെ പെപ്പും ക്ലബ്ബ് വിടുമെന്ന് റിപ്പോർട്ടുകളുണ്ടായിരുന്നു.

സ്പാനിഷ് ക്ലബ്ബ് ബാഴ്‌സലോണയുടെ സ്‌പോർട്ടിങ് ഡയറക്ടറായിരുന്ന ബെഗിരിസ്റ്റൈൻ സിറ്റിയിലേക്ക് കൂടുമാറിയ ശേഷമാണ് പെപ് സിറ്റിയിലേക്കെത്തുന്നത്. പിന്നീട് സിറ്റിയുടെ എണ്ണം പറഞ്ഞ നേട്ടങ്ങൾക്ക് പിന്നിൽ ചരടുവലിച്ചത് ബെഗിരിസ്റ്റൈൻ -ഗാർഡിയോള സഖ്യമാണ്.

2016-17 സീസണിലാണ് പെപ് സിറ്റിക്കൊപ്പം ചേരുന്നത്. അവിടുന്നിങ്ങോട്ട് നീണ്ട ഏഴ് വർഷക്കാലത്തിനിടക്ക് നിരവധി കിരീടങ്ങൾ സിറ്റിയുടെ ഷെൽഫിലെത്തിച്ചു.ചരിത്രത്തിലാദ്യമായി സിറ്റി ചാമ്പ്യൻസ് ലീഗ് കിരീടത്തിൽ മുത്തമിട്ടത് ഗാർഡിയോളക്ക് കീഴിലാണ്.