നാലു വ്യാഴവട്ടക്കാലം ചെലവിട്ട യുഎഇയോട്​ വിട പറഞ്ഞ് സേതുമാധവന്‍​

ഏറ്റവും കൂടുതൽ കാലം പ്രവാസമണ്ണിൽ ചെലവിട്ട ചുരുക്കം മലയാളികളുടെ കണ്ണി​യി​ലാണ്​ സേതുമാധവൻ എന്ന ഈ കണ്ണൂർക്കാരൻ. മകൾക്കും ഭാര്യക്കുമൊപ്പം അമേരിക്കയിലായിരിക്കും ശിഷ്​ടകാലം

നാലു വ്യാഴവട്ടക്കാലം ചെലവിട്ട യുഎഇയോട്​ വിട പറയുമ്പോള്‍ സേതുമാധവന്​ ഓര്‍ക്കാന്‍ നല്ലതു മാത്രം. മറ്റു പലരെയും പോലെ നാട്ടിലേക്കല്ല ഈ പ്രവാസിയുടെ മടക്കം. മകൾക്കും ഭാര്യക്കുമൊപ്പം അമേരിക്കയിലായിരിക്കും ശിഷ്​ടകാലം കഴിച്ചു കൂട്ടുക.

1969ൽ ഇരുപതാം വയസിൽ ആയിരുന്നു സേതുമാധവൻ യു.എ.ഇയിലെത്തിയത്​. മറ്റു പലരെയും ​പോലെ പത്തേമാരിയിൽ ഖോർഫുകാനിൽ. ഏറ്റവും കൂടുതൽ കാലം പ്രവാസമണ്ണിൽ ചെലവിട്ട ചുരുക്കം മലയാളികളുടെ കണ്ണി​യി​ലാണ്​ സേതുമാധവൻ എന്ന ഈ കണ്ണൂർക്കാരൻ.

യു.എ.ഇയിൽ ചെലവിട്ട ഏതാണ്ട്​ അഞ്ച് പതിറ്റാണ്ടുകാലവും ഇൻഷുറൻസ്​ മേഖലയിൽ ആയിരുന്നു ജോലി. യു.എ.ഇ പിറവിയെടുക്കും മു​മ്പേ എത്തിയതിനാൽ പാസ്​​പോർട്ടിൽ ട്രൂഷ്യൽ സ്​റ്റേറ്റി​ന്റെ സീലാണുള്ളത്​. 1974ൽ സേതുമാധവ​ന്റെ ബൈക്കിന്​ ദുബൈയുടെ 39ആം നമ്പർ രജിസ്ട്രേഷൻ ആയിരുന്നു ലഭിച്ചത്​.

ദുബൈ എന്ന നഗരവും യു.എ.ഇ എന്ന രാജ്യവും തനിക്ക്​ നൽകിയത്​ മറക്കാനാവാത്ത നേട്ടങ്ങളും അനുഭവവുമാണെന്ന്​ സേതു​മാധവൻ. ഇനിയുള്ള കാലം അമേരിക്കയിൽ. എങ്കിലും യു.എസ്​ ഗ്രീൻ കാർഡുള്ളതിനാൽ വിസ ഓണ്‍ അറൈവൽ മുഖേന എപ്പോൾ വേണമെങ്കിലും ഇവിടെ എത്താനാകും. ആ സംതൃപ്​തിയിലാണ്​ മടക്കം.