എല്ലാവരും രാജ്യത്തെ സ്നേഹിക്കുന്നു, ദേശസ്‌നേഹം എങ്ങനെ പ്രകടിപ്പിക്കണമെന്ന് തീരുമാനിക്കാന്‍ നിങ്ങളാരാണ്? പ്രകാശ് രാജ്
'ഒരു പൗരനെന്ന നിലയില്‍ ശരിയും തെറ്റും എന്താണെന്ന് എനിക്ക് മനസിലാവും'
Update: 2022-11-01 12:54 GMT
ഹിന്ദുത്വ ഉള്ളടക്കങ്ങളെ തന്‍റെ സിനിമയിലൂടെ പിന്തുണയ്ക്കില്ലെന്ന് നടന്‍ പ്രകാശ് രാജ്. ഇന്ത്യയിലെ പൗരനെന്ന നിലയില്‍ ശരിയും തെറ്റും തിരിച്ചറിയാന്‍ കഴിയും. ദ ന്യൂസ് മിനുട്ടിന് നല്‍കിയ അഭിമുഖത്തിലാണ് പ്രകാശ് രാജിന്‍റെ പ്രതികരണം.
തന്‍റെ പുതിയ വെബ് സീരീസായ മുക്ബീറിനെ കുറിച്ച് സംസാരിക്കുകയായിരുന്നു പ്രകാശ് രാജ്. സമീപകാല സിനിമകളിലെ ഹിന്ദുത്വ അജണ്ടകളെ കുറിച്ച് പ്രകാശ് രാജ് പറഞ്ഞതിങ്ങനെ- "ശരിയാണ്. ഞാനും ഇത് കാണാറുണ്ട്. ഒരു പൗരനെന്ന നിലയില്‍ ശരിയും തെറ്റും എന്താണെന്ന് എനിക്ക് മനസിലാവും. ഞാനത് പ്രോത്സാഹിപ്പിക്കില്ല. മുക്ബീര്‍ അങ്ങനെയുള്ള ഒന്നിനെയും പ്രോത്സാഹിപ്പിക്കുന്നില്ല. ആരാലും പ്രകീര്‍ത്തിക്കപ്പെടാത്ത സ്‌പൈ ഏജന്‍റുമാരെ കുറിച്ചുള്ളതാണ് ഈ വെബ് സീരീസ്".
ദേശസ്‌നേഹം എങ്ങനെ പ്രകടിപ്പിക്കണമെന്ന് ചിലര്‍ തീരുമാനിക്കുന്നുവെന്നും പ്രകാശ് രാജ് പ്രതികരിച്ചു. അതെങ്ങനെ പ്രകടിപ്പിക്കണമെന്ന് തീരുമാനിക്കാന്‍ നിങ്ങളാരാണെന്നാണ് പ്രകാശ് രാജിന്‍റെ ചോദ്യം- "രാജ്യത്തോടുള്ള സ്‌നേഹമെന്താണ്? രാജ്യത്തോടുള്ള സ്‌നേഹം എങ്ങനെയാണ് ഒരാള്‍ പ്രകടിപ്പിക്കുന്നത്? എന്റെ അഭിപ്രായത്തില്‍ ഒരു കര്‍ഷകന്‍ കൃഷി ചെയ്താണ് രാജ്യത്തോടുള്ള സ്‌നേഹം പ്രകടിപ്പിക്കുന്നത്. ഈ രാജ്യത്തെ എല്ലാവരും സ്‌നേഹിക്കുന്നുണ്ട്. ഡ്രൈവര്‍ വണ്ടിയോടിക്കുന്നു. പൈലറ്റ് വിമാനം പറത്തുന്നു. ലോക്കോ പൈലറ്റ് ട്രെയിന്‍ ഓടിക്കുന്നു. ഡോക്ടര്‍മാരും എഞ്ചിനിയര്‍മാരും ആര്‍ക്കിടെക്ടുകളും കലാകാരന്മാരുമെല്ലാം ജോലി ചെയ്യുന്നു. അവരെല്ലാം ഈ രാജ്യത്തിന്റെ ഭാഗമാണ്. അവരെല്ലാം രാജ്യത്തെ സ്നേഹിക്കുന്നു. ഇക്കാലത്ത് ദേശീയതയെ ദുര്‍വ്യാഖ്യാനം ചെയ്യുകയും ദുരുപയോഗം ചെയ്യുകയുമാണ്"- പ്രകാശ് രാജ് പറഞ്ഞു.