"ഫാസിലിൻ്റെ കുഞ്ഞ് എൻ്റെയുമാണ്" - മലയൻകുഞ്ഞ് ഔദ്യോഗിക ട്രെയ്‌ലർ പങ്കുവെച്ച് ആവേശഭരിതനായി കമൽ ഹാസൻ

ഫഹദ് ഫാസിൽ നായകനായി എത്തുന്ന ഏറ്റവും പുതിയ ചിത്രം 'മലയൻകുഞ്ഞി'ന്‍റെ ഔദ്യോഗിക ട്രെയ്‌ലർ പങ്കുവെച്ച് കമൽ ഹാസൻ. മലയാളത്തിൽ ഇന്നോളം കണ്ടിട്ടില്ലാത്ത 'വിഷ്വൽ - ട്രീറ്റ്' ഉറപ്പ് നൽകുന്ന ട്രെയ്‌ലർ വൻ ജനശ്രദ്ധ നേടിയിരുന്നു. ഇപ്പോഴിതാ സാക്ഷാൽ കമൽ ഹാസൻ തന്നെ ചിത്രത്തിൻ്റെ ട്രെയ്‌ലർ ലിങ്ക് ട്വിറ്ററിൽ ആവേശത്തോടെ പങ്കുവെച്ചിരിക്കുകയാണ്. ഫഹദുമായിട്ടുമുള്ള സ്നേഹബന്ധത്തെയും വിക്രം സിനിമയുമായിയുള്ള ബന്ധത്തെയും കുറിച്ചും വാചാലനാകാനും ഉലകനായകന്‍ മറന്നില്ല

കമൽ ഹാസൻ്റെ വാക്കുകൾ ഇങ്ങനെ.

"ഫാസിലിൻ്റെ കുഞ്ഞ് എൻ്റെയുമാണ്. മികവുറ്റ എന്തും എന്നും വിജയിക്കുക തന്നെ ചെയ്യണം. ഫഹദ് നിങ്ങൾ മുന്നോട്ട് തന്നെ കുതിക്കൂ. എൻ്റെ എല്ലാ ഏജൻ്റുകളും എപ്പോഴും ജയിക്കണം. തോൽവി ഒരിക്കലും നമ്മുടെ തിരഞ്ഞെടുപ്പ് അല്ല. ഒരു ടീമിൻ്റെ മൂല്യം എന്താണെന്ന് എല്ലാവര്‍ക്കും കാണിച്ച് കൊടുക്കൂ"

പ്രകൃതി ദുരന്തത്തിൻ്റെ ആഴവും ഭീകരതയും പങ്കുവെച്ച സമാനതകളില്ലാത്ത ദൃശ്യാനുഭവം ആണ് ട്രെയ്‌ലറിൽ അണിയറപ്രവര്‍ത്തകര്‍  കാഴ്ചവെച്ചിരിക്കുന്നത്. എ. ആർ. റഹ്മാൻ്റെ മികവുറ്റ പശ്ചാത്തല സംഗീതവും ഫഹദ് ഫാസിലിൻ്റെ ആഴമേറിയ അഭിനയ മുഹൂർത്തങ്ങളും ട്രെയ്‌ലറിലെ ചുരുക്കം രംഗങ്ങളിൽ നിന്ന് തന്നെ പ്രേക്ഷകരില്‍ നിന്ന് വലിയ തോതിൽ പ്രശംസകൾ നേടിയെടുത്തിരുന്നു.

പതിനെട്ട് വർഷങ്ങൾക്ക് ശേഷം മലയാള സിനിമ കണ്ട എക്കാലത്തെയും വലിയ 'ട്രെൻഡ്സെറ്റർ' ഫാസിൽ നിർമിക്കുന്ന ചിത്രമെന്ന പ്രത്യേകത ഈ ചിത്രത്തിനുണ്ട്. കൂടാതെ ഫഹദ് ഫാസിൽ - ഫാസിൽ കൂട്ടുകെട്ട് ഇരുപത് വർഷങ്ങൾക്ക് ശേഷമാണ് ഒരു ചിത്രത്തിനായി വീണ്ടും ഒരുമിക്കുന്നത്. ഫാസിൽ തന്നെ സംവിധാനം ചെയ്ത് ഫഹദ് ഫാസിൽ ആദ്യമായി നായകനായ 'കയ്യെത്തും ദൂരത്ത്' ആണ് ഇവർ ഇതിന് മുൻപ് ഒരുമിച്ച് പ്രവർത്തിച്ച അവസാന ചിത്രം.

നവാഗതനായ സജിമോനാണ് ചിത്രത്തിൻ്റെ സംവിധായകൻ. മഹേഷ് നാരായണനാണ് ചിത്രത്തിൻ്റെ രചനയും ഛായാഗ്രഹണവും നിർവഹിച്ചിരിക്കുന്നത്. 30 വർഷത്തിന് ശേഷം എ. ആർ. റഹ്മാന്‍റെ മലയാളത്തിലേക്കുള്ള തിരിച്ചുവരവ് എന്ന പ്രത്യേകത കൂടിയുണ്ട് ഈ ചിത്രത്തിന്. 1992ൽ വന്ന 'യോദ്ധ'യാണ് ഇതിന് മുമ്പ് റഹ്മാൻ സംഗീതസംവിധാനം നിർവഹിച്ച് പുറത്തിറങ്ങിയ ഒരേയൊരു മലയാള ചലച്ചിത്രം. രജിഷാ വിജയൻ ആണ് ചിത്രത്തിലെ നായിക. ഇന്ദ്രന്‍സ്, ജാഫര്‍ ഇടുക്കി, ജയ കുറുപ്പ്, ദീപക് പറമ്പോല്‍, അർജുൻ അശോകൻ, ജോണി ആൻ്റണി, ഇർഷാദ് തുടങ്ങിയവരാണ് മറ്റ് പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്.

അണിയറപ്രവർത്തകർ ഇതിനോടകം തന്നെ പേക്ഷകർക്കുള്ള‌ മുന്നറിയിപ്പ്‌ നോട്ടീസ് പരസ്യമായി നൽകിയ ചിത്രം കൂടിയാണ് മലയൻകുഞ്ഞ്. "നിങ്ങൾ ക്ലോസ്ട്രോഫോബിയ നേരിടുന്ന ഒരു വ്യക്തി ആണെങ്കിൽ ഞങ്ങളുടെ ചിത്രം കാണുന്നതിന് മുമ്പ് സൂക്ഷിക്കുക" എന്ന മുന്നറിയിപ്പോടുകൂടിയ പോസ്റ്ററാണ്‌ സോഷ്യൽ മീഡിയയിലൂടെ കഴിഞ്ഞ ദിവസം പുറത്ത് വിട്ടിരുന്നത്. പരിമിതമായ ഇടങ്ങളിലും അടഞ്ഞ സ്ഥലങ്ങളിലുമൊക്കെ പരിഭ്രാന്തി ഉണർത്തുന്ന ഒരു മാനസികാവസ്ഥയെയാണ് ക്ലോസ്ട്രോഫോബിയ എന്ന് വിളിക്കുന്നത്. സമൂഹത്തിൽ 12.5 ശതമാനത്തോളം ആൾകാർക്ക് ചെറുതും വലുതുമായുള്ള രീതിയിൽ അനുഭവിക്കുന്ന ഒരു മാനസികാവസ്ഥ കൂടിയാണിത്. അതുകൊണ്ട് ഈ മുന്നറിയിപ്പ് മനസിലാക്കി അത് നേരിടാൻ താല്പര്യമുള്ളവർ മാത്രം സിനിമ കാണുക എന്നാണ് അണിയറപ്രവർത്തകർ പങ്കുവെച്ചത്. ജൂലൈ 22ന് 'സെഞ്ച്വറി ഫിലിംസ്‌ ചിത്രം തിയേറ്ററുകളിലെത്തിക്കും.

അര്‍ജു ബെന്‍ ആണ് ചിത്രസംയോജനം സിനിമയുടെ നിർവഹിച്ചിരിക്കുന്നത്. പ്രൊഡക്ഷന്‍ ഡിസൈന്‍: ജ്യോതിഷ് ശങ്കർ, പ്രൊഡക്ഷന്‍ കണ്‍ട്രോളര്‍: ബെന്നി കട്ടപ്പന, എക്സിക്യൂട്ടിവ് പ്രൊഡ്യൂസർ: പി. കെ. ശ്രീകുമാർ, സൗണ്ട് ഡിസൈന്‍: വിഷ്‍ണു ഗോവിന്ദ്-ശ്രീ ശങ്കർ, സിങ്ക് സൗണ്ട്: വൈശാഖ്. പി. വി, മേക്കപ്പ്: രഞ്ജിത്ത് അമ്പാടി, വസ്ത്രാലങ്കാരം: ധന്യ ബാലകൃഷ്‍ണന്‍, സംഘട്ടനം: റിയാസ്-ഹബീബ്, ഡിസൈൻ: ജയറാം രാമചന്ദ്രൻ, കളറിസ്റ്റ്: ലിജു പ്രഭാകർ, മാർക്കറ്റിംഗ്: ഹെയിൻസ്, വാർത്താ പ്രചരണം: എം. ആർ. പ്രൊഫഷണൽ