ആധാർ നിർബന്ധമാക്കാനുള്ള നീക്കം; പ്രവാസി സമൂഹം ആശങ്കയില്‍

പ്രവാസികളുടെ ഇന്ത്യയിൽ നടക്കുന്ന വിവാഹത്തിന്​ കൂടി ആധാർ നിർബന്ധമാക്കാനാണ്​ കേന്ദ്രനീക്കം

എല്ലാ തുറകളിലും ആധാർ നിർബന്ധമാക്കാനുള്ള കേന്ദ്രസർക്കാർ നീക്കം പ്രവാസി സമൂഹത്തെ വീണ്ടും ആശങ്കയിലാക്കി. പ്രവാസികളുടെ ഇന്ത്യയിൽ നടക്കുന്ന വിവാഹത്തിന്​ കൂടി ആധാർ നിർബന്ധമാക്കാനാണ്​ കേന്ദ്രനീക്കം. അതേ സമയം നിയമ​പ്രകാരം പ്രവാസികൾക്ക്​ ആധാർ കാർഡിന്​ അർഹതയില്ലെന്ന മുൻനിലപാടിലും ഭരിക്കുന്നവർ മാറ്റം വരുത്തിയിട്ടില്ല.

കേന്ദ്ര, സംസ്ഥാന സർക്കാരുകളുമായി ബന്ധപ്പെട്ട ഏതൊരു കാര്യത്തിനും ആധാർ കാർഡ് നിർബന്ധമാക്കാൻ തിരക്കിട്ട നടപടികളാണ്​ പുരോഗമിക്കുന്നത്​പ്രവാസികളുടെ ഇന്ത്യയിൽ നടക്കുന്ന വിവാഹത്തിനും ആധാർ നിർബന്ധമാക്കണമെന്നാണ്​ സംയുക്ത മന്ത്രാലയ സമിതി ഏറ്റവും ഒടുവിൽ വിദേശകാര്യ മന്ത്രാലയത്തിന്​ റിപ്പോർട്ട്​ സമർപ്പിച്ചിരിക്കുന്നത്​. ഇതോടെ എൻആർഐ, ഓവർസീസ് സിറ്റിസൺസ് ഓഫ് ഇന്ത്യ, പഴ്സൺസ് ഓഫ് ഇന്ത്യൻ ഒറിജിൻ എന്നിവരുടെയെല്ലാം ഇന്ത്യയിൽ നടത്തുന്ന വിവാഹങ്ങൾക്ക്, ആധാർ നിർബന്ധമാകും.

പാൻ, മൊബൈൽ നമ്പർ, ബാങ്ക് അക്കൗണ്ട് തുടങ്ങിയവ ഉടനടി ആധാറുമായി ബന്ധിപ്പിക്കണമെന്നാണ്​ ചട്ടം. എഫ്സിഎൻആർ, എൻആർഇ ഒഴികെയുള്ള എല്ലാ ബാങ്ക് അക്കൗണ്ടുകളും, ആധാറുമായിഡിസംബർ 31നകം ബന്ധിപ്പിക്കണമെന്നും വ്യവസ്​ഥയുണ്ട്​. ഇന്ത്യയിൽ വരുമ്പോൾ സ്ഥിരമായി ഒരേ മൊബെൽ നമ്പർ ഉപയോഗിക്കുന്ന പ്രവാസികളും വെട്ടിലാകും. 2018 ഫെബ്രുവരിക്കു മുമ്പ്​ ആധാറുമായി ബന്ധിപ്പിച്ചില്ലെങ്കിൽ സിം കാർഡ്​ പ്രവർത്തനരഹിതമാകും. ഇന്ത്യയിൽ മറ്റ് ഇടപാടുകൾ ഉള്ള വിദേശ ഇന്ത്യക്കാർക്ക്, ആധാർ ഇല്ലാതെ ഒന്നും നടക്കില്ലെന്ന്​ ചുരുക്കം.

നിശ്ചിത കാലം ഇന്ത്യയിൽ നിന്ന്​ മാറിനിൽക്കുന്ന പ്രവാസികൾ ഉൾപ്പെടെയുള്ളവർക്ക്​ നിയമപ്രകാരം ആധാറിന്​ അപേക്ഷിക്കാൻ വകുപ്പില്ല. വിദേശ ഇന്ത്യക്കാർക്ക്​ ആധാർ നിർബന്​ധമല്ലെന്ന്​ കേന്ദ്രം ആവർത്തിക്കുമ്പോൾ തന്നെയാണ്​ എല്ലാ തുറകളിലേക്കും തിരിച്ചറിയൽ കാർഡ്​ വിപുലീകരിക്കാനുള്ള നീക്കവും. പ്രശ്നം യാഥാർഥ്യബോധത്തോടെ ഉൾക്കൊള്ളാൻ കേന്ദ്രം ഇതിയെങ്കിലും തയാറാകണം എന്നാണ്​ പ്രവാസലോകം ഒന്നാകെ ആവശ്യപ്പെടുന്നതും.