മാർച്ചിൽ ഖത്തര്‍ സന്നാഹ മത്സരങ്ങളിലേക്ക്

ദോഹ: വർഷാവസാനത്തിൽ സ്വന്തം നാട്ടില്‍ നടക്കുന്ന ലോകകപ്പിന് പടപ്പുറപ്പാടുമായി ഖത്തർ ഫുട്​ബാൾ ടീം. ലോകത്തിന്‍റെ വിവിധ ഭാഗങ്ങളിൽ യോഗ്യതാ റൗണ്ട്​ മത്സരങ്ങൾ സജീവമാകുമ്പോൾ അടുത്ത മാസം സ്വന്തം മണ്ണിൽ തന്നെ ​രണ്ട്​ മത്സരങ്ങൾ കളിക്കാനുള്ള തയ്യാറെടുപ്പിലാണ്​ ഫെലിക്സ്​ സാഞ്ചസിന്‍റെയും ഹസ്സൻഹൈദോസിന്‍റെയും സംഘം. ബൾഗേറിയ, ​സ്ലൊവേനിയ ദേശീയ ടീമുകൾക്കെതിരെയാണ്​ സൗഹൃദ മത്സരങ്ങൾ. ഖത്തർ ഫുട്​ബാൾ അസോസിയേഷനാണ്​ ഇക്കാര്യം വ്യക്​തമാക്കിയത്​.മാർച്ച്​ 26ന്​ ബൾഗേറിയക്കെതിരെയാണ്​ ആദ്യ കളി. 29ന്​ ​സ്ലൊവേനിയയെ നേരിടും.

അറബ്​ മണ്ണിൽ ആദ്യമായി വിരുന്നെത്തുന്ന ലോകകപ്പിൽ മികച്ച പ്രകടനം പുറത്തെടുക്കാനുള്ള തയ്യാറെടുപ്പിലാണ്​ ഖത്തർ. ഡിസംബർ 18ന്​ അവസാനിച്ച ഫിഫ അറബ്​ കപ്പും കഴിഞ്ഞ്​ ടീം അംഗങ്ങൾ ​ലീഗ്​മത്സരങ്ങളിലേക്ക്​ സജീവമാവുകയായിരുന്നു. മാർച്ച്​ പകുതിയോടെ ലീഗ്​ സീസണിന്​ സമാപനമാവുന്നതിനു പിന്നാലെ ദേശീയ ടീമിന്‍റെ തിരക്കേറിയ സീസണുകൾക്കായിരിക്കും തുടക്കമാവുന്നത്​. മാർച്ച്​ 17നാണ്​ ഖത്തർ സ്റ്റാർസ്​ ലീഗിലെ അവസാന അങ്കങ്ങൾ.

സൗഹൃ മത്സരങ്ങളുടെ വേദികൾ ഏതെന്ന്​ തീരുമാനിച്ചിട്ടില്ല. മാർച്ചിൽ തന്നെ ഇവാൻ പെരിസിച്ചിന്‍റെയും ലൂകാ മോഡ്രിച്ചിന്‍റെയും ക്രൊയേഷ്യ ഖത്തറിൽ കളിക്കാനെത്തുന്നുണ്ട്​. എന്നാൽ, ആതിഥേയർക്കെതിരെ ഇവരുടെ മത്സരമില്ല. ക്രൊയേഷ്യ 26ന്​ ​സ്ലൊവേനിയയെയും, 29ന്​ ബൾഗേറിയയെയും നേരിടും.

ഈ വർഷം നടക്കുന്ന ലോകകപ്പും, അടുത്ത വർഷം ചൈനയിൽ നടക്കുന്ന ഏഷ്യാകപ്പുമാണ്​ ഖത്തറിന്​ മുന്നിലുള്ള വലിയ രണ്ട്​ പോരാട്ടങ്ങൾ. നിലവിലെ ഏഷ്യൻ ചാമ്പ്യന്മാർ എന്ന നിലയിൽ കിരീടം നിലനിർത്തുകയാണ്​ ലക്ഷ്യം. ലോകകപ്പിൽ ഗ്രൂപ്പ്​ റൗണ്ടിലെ വെല്ലുവിളി മറികടന്ന്​ കുതിക്കുകയും പ്രധാനമാണ്​. ഫിഫ അറബ്​ കപ്പിൽ സെമിയിൽ പുറത്തായെങ്കിലും മൂന്നാം സ്ഥാനക്കാരായിരുന്നു ഖത്തർ. നിലവിൽ ഫിഫ റാങ്കിങ്ങിൽ 48ാം സ്ഥാനക്കാർ. സ്​ളൊവേനിയ 65ഉം, ബൾഗേറിയ 71ഉം സ്ഥാനത്താണ്​.