കുട്ടികളുടെ സുരക്ഷ അധ്യാപകരുടെ ചുമതല; പെരുമാറ്റച്ചട്ടം പ്രഖ്യാപിച്ച്​ യു.എ.ഇ

യുഎഇയിൽ കുട്ടികളുടെ സുരക്ഷയും അധ്യാപകരുടെ ചുമതലയും വിശദമാക്കുന്ന​ പെരുമാറ്റച്ചട്ടം പുതുക്കി. കാമ്പസുകളിലെ ധാർമിക സാഹചര്യം മെച്ചപ്പടുത്തുന്നതിൽ ഊന്നിയുള്ളതാണ് പുതിയ പെരുമാറ്റച്ചട്ടം. രാജ്യത്തെ എല്ലാ സ്കൂളുകൾക്കും പെരുമാറ്റച്ചട്ടം ബാധകമായിരിക്കും.

കുട്ടികളെ എല്ലാതരം ചൂഷണങ്ങളിൽ നിന്നും അതിക്രമങ്ങളിൽ നിന്നും സംരക്ഷിച്ച്​പരിപാലിക്കേണ്ട ചുമതല അധ്യാപകർക്കുണ്ടെന്ന്​ ഓർമപ്പെടുത്തിയാണ്​ പെരുമാറ്റചട്ടം പുറത്തിറക്കിയത്​. അധ്യാപകർക്ക്​പുറമെ മറ്റു ജീവനക്കാർ പാലിക്കേണ്ട മാര്യാദകളും സ്വഭാവഗുണങ്ങളും മാർഗനിർദേശങ്ങളിൽ ഉൾപ്പെടുത്തിയിട്ടുണ്ട്​. ജീവനക്കാർ ജോലിസ്ഥലത്തെ സാംസ്കാരികവും മതപരവും വംശീയവുമായ വൈവിധ്യത്തെ മാനിക്കണം. സഹപ്രവർത്തകരോട്​ഏതെങ്കിലും തരത്തിലുള്ള അവഗണനയോ വിവേചന​മോ പുലർത്താൻ പാടില്ലെന്നും ചട്ടം നിഷ്കർഷിച്ചിട്ടുണ്ട്​.

സ്കൂളിൽ​ പുകവലിക്കുകയോ മറ്റേതെങ്കിലും ലഹരി ഉൽപന്നങ്ങളുടെ സ്വാധീനത്തിലോ ആരും പെടാൻ പാടില്ലെന്നും നിയമം വ്യക്​തമാക്കുന്നു.​ എല്ലാ ജീവനക്കാരും യു.എ.ഇയുടെ സാംസ്കാരിക പാരമ്പര്യത്തെ മാനിച്ച വസ്ത്രധാരണം പാലിക്കണം. അധ്യാപകരും ജീവനക്കാരും പാലിക്കേണ്ട മൂല്യങ്ങളുടെ ചട്ടക്കൂടാണ് ​രൂപപ്പെടുത്തിയതെന്ന് ​വിദ്യഭ്യാസ മന്ത്രി ഡോ. അഹമ്മദ്​അൽ ഫലാസി പറഞ്ഞു. മന്ത്രാലയം അംഗീകരിച്ച കരിക്കുലം അനുസരിച്ച് ​പ്രവർത്തിക്കുന്ന എല്ലാ പൊതു-സ്വകാര്യ സ്കൂളുകൾക്കും പെരുമാറ്റച്ചട്ടം ബാധകമായിരിക്കും. ദുബൈയിലെ എല്ലാ സ്വകാര്യ സ്കൂളുകളിലും നിയമം അനുസരിക്കേണ്ടതുണ്ട്​. യുവാക്കൾക്ക് നല്ല മാതൃകകളാകാൻ അധ്യാപകരെ സഹായിക്കുന്നതാണ് ​മന്ത്രാലയം രൂപപ്പെടുത്തിയ പെരുമാറ്റച്ചട്ടം.