ജമ്മു കശ്മീർ മന്ത്രിസഭാ രൂപീകരണം; നാഷണൽ കോൺഫറൻസിന് പിന്തുണ നൽകാൻ ആംആദ്മി

ന്യൂഡൽഹി: ജമ്മു കശ്മീർ മന്ത്രിസഭാ രൂപീകരണത്തിൽ നാഷണൽ കോൺഫറൻസിന് പിന്തുണ നൽകാൻ തീരുമാനിച്ച് ആംആദ്മി പാർട്ടി. ഇതോടെ ഇൻഡ്യ സഖ്യത്തിന്റെ അംഗബലം 54 ആയി മാറും. പിന്തുണ അറിയിച്ച്‌ നാല് സ്വതന്ത്ര എംഎൽഎമാരും കത്ത് നൽകിയിരുന്നു.

ജമ്മുവിൽ സർക്കാർ രൂപീകരണ ചർച്ച പുരോ​ഗമിക്കുകയാണ്. പിന്തുണയറിയിച്ചുള്ള കത്ത് ആംആദ്മി പാർട്ടി ലെഫ്റ്റനൻ്റ് ​ഗവർണർക്ക് കൈമാറി. നാഷണൽ കോൺഫറൻസിന് 42ഉം, കോൺ​ഗ്രസിന് ആറും സീറ്റാണുള്ളത്. അതേസമയം, ശക്തമായ പ്രതിപക്ഷമായി പ്രവർത്തിക്കുമെന്ന് പിഡിപി വ്യക്തമാക്കി.

ഇന്ന് വൈകുന്നേരം കോൺ​ഗ്രസ് നിയമസഭാ കക്ഷിയോ​ഗം ചേരുന്നുണ്ട്. ഇതിനുശേഷം പിന്തുണക്കത്ത് ഒമർ അബ്ദുള്ളക്ക് കൈമാറും. സത്യപ്രതിജ്ഞയ്ക്കുള്ള തീയ്യതിയും ഇന്ന് തീരുമാനിക്കുമെന്നാണ് ലഭിക്കുന്ന സൂചന.