മണിപ്പൂരിൽ മുന്നേറ്റം തുടർന്ന് ബിജെപി

എക്സിറ്റ് പോളുകൾ ശരി​വെച്ച് മണിപ്പൂരിൽ ബിജെപി ലീഡ് തുടരുന്നു. നിലവിൽ 23 സീറ്റിൽ ബിജെപി മുന്നിലുണ്ട്. 60 സീറ്റുകളുള്ള സംസ്ഥാനത്ത് കേവല ഭൂരിപക്ഷത്തിലേക്ക് അടുക്കുകയാണ് ബിജെപി. കോൺഗ്രസ് 14 സീറ്റിൽ ലീഡ് ചെയ്യുന്നു. നാഷണൽ പീപ്പിൾസ് പാർട്ടി 9 സീറ്റിൽ മുന്നേറുന്നു. നാഗാ പീപ്പിൾസ് ഫ്രണ്ട് അടക്കമുള്ള മറ്റു പാർട്ടികൾ 14 ഇടങ്ങളിൽ മുന്നിലാണ്. മണിപ്പൂരിൽ ബി.ജെ.പി വീണ്ടും അധികാരത്തിൽ വരുമെന്നാണ്​ എക്സിറ്റ്​ പോൾ ഫലങ്ങൾ സൂചിപ്പിച്ചിരുന്നത്​.

2017​ലെ തെരഞ്ഞെടുപ്പിൽ 21 സീറ്റുകൾ നേടിയ ബി.ജെ.പി നാല്​ വീതം സീറ്റുകളുള്ള നാഗാ പീപ്പിൾസ്​ ഫ്രണ്ട്​, നാഷണൽ പീപ്പിൾസ്​ പാർട്ടി എന്നിവയുമായി ചേർന്ന്​ അധികാരത്തിൽ വരികയായിരുന്നു. ലോക്​ ജനശക്​തി പാർട്ടി, തൃണമൂൽ കോൺഗ്രസ്​ എന്നിവരുടെ ഓരോ അംഗങ്ങളും ഒരു സ്വതന്ത്രനും ബിജെപിക്ക്​ പിന്തുണ നൽകി. നോങ്തോംബം ബിരേൻ സിങ് ആയിരുന്നു​ മുഖ്യമന്ത്രി. അതേസമയം, ഇത്തവണ ബിജെപി ഒറ്റക്കാണ്​ തെരഞ്ഞെടുപ്പിനെ നേരിട്ടത്​. കോൺഗ്രസ് എം.എൽ.എമാരിൽ പകുതിയിലേറെയും ബിജെപിയിലേക്കും മറ്റും പാർട്ടികളിലേക്കും കൂറുമാറി. അത് ആവർത്തിക്കാതിരിക്കാൻ കോൺഗ്രസിൻറെ പ്രത്യേക പ്രതിനിധികൾ ഇംഫാലിലെത്തിക്കഴിഞ്ഞിട്ടുണ്ട്.

കോൺഗ്രസും സിപിഐയും ചേർന്ന്​ മണിപ്പൂർ പ്രോഗസീവ്​ സെക്യൂലർ അലയൻസ്​ എന്ന സഖ്യം രൂപീകരിച്ചിട്ടുണ്ട്​. സിപിഎം, റവല്യൂഷണറി സോഷ്യലിസ്റ്റ് പാർട്ടി, ജനതാദൾ (എസ്), ഫോർവേഡ് ബ്ലോക്ക് എന്നിവയുടെ പിന്തുണയും ഈ സഖ്യത്തിനുണ്ട്.