രാജ്യസഭാ സീറ്റ് കേരള കോണ്‍ഗ്രസിന് ; പ്രതിഷേധം വ്യാപകം
Update: 2018-06-14 14:29 GMT
യൂത്ത് കോണ്‍ഗ്രസിന്റെയും കെഎസ്‍യുവിന്റെയും നേതൃത്വത്തില്‍ ഇന്നലെ രാത്രിയില്‍ തന്നെ വിവിധയിടങ്ങളില്‍ പ്രതിഷേധ പ്രകടനങ്ങള്‍ നടന്നു
രാജ്യസഭാ സീറ്റ് കേരള കോണ്‍ഗ്രസിന് നല്‍കിയതിനെതിരെ പ്രതിഷേധം വ്യാപകമാകുന്നു. യൂത്ത് കോണ്‍ഗ്രസിന്റെയും കെഎസ്‍യുവിന്റെയും നേതൃത്വത്തില്‍ ഇന്നലെ രാത്രിയില്‍ തന്നെ വിവിധയിടങ്ങളില്‍ പ്രതിഷേധ പ്രകടനങ്ങള്‍ നടന്നു. പലയിടങ്ങളും നേതൃത്വത്തിന്റെ കോലവും യൂത്ത് കോണ്‍ഗ്രസ് പ്രവര്‍ത്തകര്‍ കത്തിച്ചു.
രാജ്യസഭാസീറ്റ് കൈമാറിയ വാര്‍ത്ത വന്ന ഉടനെ നവമാധ്യമങ്ങളിലൂടെയും മറ്റും ഉയര്‍ന്ന പ്രതിഷേധങ്ങള്‍ക്ക് പുറമെയാണ് പലസ്ഥലങ്ങളിലും യൂത്ത് കോണ്‍ഗ്രസ് കെഎസ് യു പ്രവര്‍ത്തകര്‍ തെരുവിലിറങ്ങിയത്. കോഴിക്കോട് നഗരത്തില്‍ നടന്ന പ്രതിഷേധ പ്രകടനത്തിന് ഡിസിസി ജന.സെക്രട്ടറി ഐപി രാജേഷും കെഎസ് യു ജില്ലാ പ്രസിഡന്റ് വിടി നിഹാലും നേതൃത്വം നല്‍കി.
പിറവത്തും മൂവാറ്റുപുഴയിലും യൂത്ത് കോണ്‍ഗ്രസിന്റെ നേതൃത്വത്തില്‍ പ്രതിഷേധ പ്രകടനങ്ങള്‍ നടന്നു. പ്രവര്‍ത്തകര്‍ കോണ്‍ഗ്രസ് നേതൃത്വത്തിന്റെ കോലം കത്തിച്ചു. കായംകുളത്ത് യൂത്ത്കോണ്‍ഗ്രസ് കെഎസ്‍യു പ്രവര്‍ത്തകര്‍ കെഎം മാണിയുടെ കോലം കത്തിച്ചു. നേതാക്കളുടെ കോലം കത്തിച്ചാണ് കൊല്ലം ചവറയിലും യൂത്ത് കോണ്‍ഗ്രസ് പ്രവര്‍ത്തകര്‍ പ്രതിഷേധിച്ചത്.