വെണ്ണക്കര ബൂത്തിൽ കോൺഗ്രസ്- ബിജെപി വാക്കുതർക്കം; രാഹുൽ മാങ്കൂട്ടത്തിലിനെ തടഞ്ഞ് ബിജെപി പ്രവർത്തകർ
ബൂത്ത് സന്ദർശനത്തിന് എത്തിയതായിരുന്നു രാഹുൽ
Update: 2024-11-20 12:05 GMT
പാലക്കാട്: വെണ്ണക്കര ഗവൺമെന്റ് സ്കൂളിൽ രാഹുൽ മാങ്കൂട്ടത്തിലിനെ തടഞ്ഞു. BJP പ്രവർത്തകരാണ് തടഞ്ഞത്. ബൂത്ത് സന്ദർശനത്തിനെത്തിയതായിരുന്നു രാഹുൽ. വെണ്ണക്കര ബൂത്തിൽ കോൺഗ്രസും ബിജെപിയും തമ്മിൽ വാക്കുതർക്കമുണ്ടായി. തോൽക്കാൻ പോകുന്നതിൻ്റെ പേടിയാണെന്ന് രാഹുൽ പ്രതികരിച്ചു.
'പോളിങ് സ്റ്റേഷനകത്തേക്ക് പോകാനാണ് സ്ഥാനാർഥികൾക്ക് പാസ് നൽകുന്നത്. ഇവിടെ യുഡിഎഫിന് വലിയ ഭൂരിപക്ഷമുള്ള പ്രദേശമാണ്. വോട്ടർമാർ പരാതി പറഞ്ഞതിൻ്റെ അടിസ്ഥാനത്തിലാണ് ഇവിടെയെത്തിയത്. ഞാൻ വരുന്നതിനു മുൻപ് ഇടതുപക്ഷ സ്ഥാനാർഥി ഇവിടെയെത്തി. അപ്പോൾ ബിജെപി പ്രവർത്തകർക്ക് പ്രശ്നമില്ല.'- രാഹുൽ പറഞ്ഞു.
'വോട്ടർമാരോട് ഗുണ്ടായിസമാണ് അവരുടെ ഭാഷ. അതിനുള്ള മറുപടിയായിരിക്കും 23ാം തീയതി പുറത്തുവരിക'യെന്നും രാഹുൽ പ്രതികരിച്ചു.
രാഹുൽ ബൂത്തിനകത്ത് കയറി വോട്ട് ചോദിച്ചെന്നാണ് ബിജെപി പ്രവർത്തകരുടെ ആരോപണം. എന്നാൽ രാഹുൽ ഇത് നിഷേധിച്ചു. സ്ഥാനാർഥി മടങ്ങണമെന്ന് സിപിഎം, ബിജെപി പ്രവർത്തകർ ആവശ്യപ്പെട്ടു.