വിദ്വേഷ പ്രസംഗം: കലാപശ്രമം നടത്തിയതിന്​ കേസെടുത്ത്​ വെള്ളാപ്പള്ളി നടേശനെ അറസ്​റ്റ്​ ചെയ്യണം -SNDP സംരക്ഷണ സമിതി

കൊല്ലം: ജാതിയുടെ ഭ്രാന്താലയമായിരുന്ന കേരളത്തെ ജാതിഭേദം, മതദ്വേഷം ഏതുമില്ലാതെ സർവരും സോദരത്വേന വാഴുന്ന മാതൃകാ കേരളമാക്കിയ ശ്രീനാരായണ ഗുരുദേവൻ രൂപം നൽകിയ എസ്​എൻഡിപി യോഗത്തി​ന്റെ കസേരയിലിരുന്ന് കേരളത്തെ മതതീവ്രവാദത്തി​ന്റെ ഭ്രാന്താലയമാക്കുന്ന വെള്ളാപ്പള്ളി നടേശനെതിരെ മതവിദ്വേഷ പ്രസംഗം നടത്തി കലാപശ്രമം നടത്തിയതിന് കേസെടുത്ത് അറസ്റ്റു ചെയ്യണമെന്ന്​ എസ്​എൻഡിപി സംരക്ഷണ സമിതി ചെയർമാൻ അഡ്വ. എസ്​. ചന്ദ്രസേനൻ ആവശ്യപ്പെട്ടു. പി.സി ജോർജ്​ ഒരു ചാനലിൽ നടത്തിയ അഭിപ്രായത്തിന് കേസെടുത്ത കേരള ആഭ്യന്തര വകുപ്പ്, വെള്ളാപ്പള്ളി നടേശൻ മലപ്പുറത്ത് അതിതീവ്രമായ മത വിദ്വേഷ പ്രസംഗമാണ് നടത്തിയത്.

സ്വന്തം കാര്യസാധ്യത്തിനും കൊള്ള മുതൽ സംരക്ഷിക്കാനും വേണ്ടി ഈ മതതീവ്രവാദിക്ക് കേരള വിദ്യാഭ്യാസ ആക്ട് സെക്ഷ ൻ 5 ( b)യ്ക്ക് വിരുദ്ധമായി ചേർത്തല ഗവ. ഹയർ സെക്കൻഡറി സ്​കൂൾ സമ്മേളനത്തിനനുവദിച്ച് ആ പരിപാടിയിൽ ആഭ്യന്തര വകുപ്പ് ഭരിക്കുന്ന കേരളത്തി​ന്റെ മുഖ്യന്ത്രിയും നാല് മന്ത്രിമാരും പങ്കെടുക്കുന്നത് കേരളത്തോടു കാട്ടുന്ന കൊടിയ വഞ്ചനയാണ്.

ഈഴവ സമുദായത്തി​ന്റെ ഭൗതിക സ്വത്തുക്കൾ വിറ്റും കൊള്ളയടിച്ചും നശിപ്പിക്കുകയും എസ്​എൻഡിപി യോഗത്തിന്റെ ആസ്ഥാന മന്ദിരം വരെ ജപ്തിയിലാക്കുകയും എസ്​എൻഡിപി യോഗത്തെ നിലപാടില്ലാത്ത സംഘടനയാക്കി മാറ്റുകയും ചെയ്​ത വെള്ളാപ്പള്ളി നടേശന് ഈഴവ സമുദായത്തെക്കുറിച്ച് ഒരക്ഷരം ശബ്ദിക്കാൻ അവകാശമില്ല. എസ്​എൻഡിപി യോഗത്തിലെ അംഗങ്ങൾക്ക് വോട്ടവകാശം നിഷേധിച്ച്, കണക്കു ചോദിക്കുന്ന അംഗത്തെ ആക്രമിച്ച്, കള്ളക്കണക്കെഴുതി തെരഞ്ഞെടുപ്പ് നടത്താതെ നിയമത്തെ കാറ്റിൽ പറത്തി, കോടതികളെ വിലയക്കെടുത്ത് ഞാനും കുടുംബവും തന്നെ എസ്​എൻഡിപി ഭരിരിക്കുമെന്ന് പ്രഖ്യാപിക്കാൻ വെള്ളാപ്പള്ളി നടേശന് എവിടെ നിന്നാണ് ഈ ധൈര്യം കിട്ടിയതെന്ന്​ ഉടൻ തന്നെ വെളിപ്പെടുത്തുമെന്നും അഡ്വ. എസ്​. ചന്ദ്രസേനൻ പറഞ്ഞു.