ആര്‍ച്ചറിന്‍റ പരിക്ക് ഗുരുതരം; രാജസ്ഥാന്‍ റോയല്‍സിന് തിരിച്ചടി
ഇന്ത്യക്കെതിരായ ടി20 പരമ്പരക്കിടെ കൈമുട്ടിനേറ്റ പരിക്കാണ് ആർച്ചറിന് വിനയായത്
ഐ.പി.എൽ സീസണ്‍ പടിവാതിലിൽ എത്തിനിൽക്കേ രാജസ്ഥാൻ റോയൽസിന് തിരിച്ചടിയായി പേസർ ജോഫ്ര ആർച്ചറുടെ പരിക്ക്. ഇന്ത്യക്കെതിരായ ടി20 പരമ്പരക്കിടെ കൈമുട്ടിനേറ്റ പരിക്കാണ് ആർച്ചറിന് വിനയായത്. പരിക്കിനെത്തുടര്‍ന്ന് ഇന്ത്യയുമായുള്ള ഏകദിന പരമ്പരയിൽ ആര്‍ച്ചറിന് കളിക്കാന്‍ സാധിക്കില്ലെന്ന് ഇംഗ്ലണ്ട് മനേജ്മെന്‍റ് അറിയിച്ചു.
മാർച്ച് 23ന് പുനെയിൽ വെച്ച് ആരംഭിക്കുന്ന മൂന്ന് മത്സരങ്ങളടങ്ങിയ ഏകദിന പരമ്പരയിലേക്കുള്ള ടീമില്‍ നിന്നാണ് ആര്‍ച്ചറിനെ ഇപ്പോള്‍ ഒഴിവാക്കിയിരിക്കുന്നത്. എന്നാല്‍ ഏപ്രില്‍ ഒന്‍പതിന് ആരംഭിക്കുന്ന ഈ വര്‍ഷത്തെ ഐ.പി.എൽ സീസണിലും താരത്തിന് മത്സരങ്ങള്‍ നഷ്ടമായേക്കുമെന്നാണ് റിപ്പോര്‍ട്ടുകള്‍. പരിക്ക് അൽപം ഗുരുതരമാണെന്ന റിപ്പോര്‍ട്ട് രാജസ്ഥാന്‍ റോയല്‍സ് ക്യാമ്പിനെ ആശങ്കയിലാഴ്ത്തിയിട്ടുണ്ട്.
വരുന്ന ഐ.പി.എല്‍ സീസണിലെ പകുതിയോളം മത്സരങ്ങൾ ആർച്ചർക്ക് നഷ്ടമാകുമെന്നാണ് പുറത്തുവരുന്ന റിപ്പോര്‍ട്ടുകള്‍. കഴിഞ്ഞ ഐ.പി.എൽ സീസണിലെ ഏറ്റവും വിലയേറിയ താരം കൂടിയായിരുന്നു രാജസ്ഥാന്‍ റോയല്‍സിന്‍റെ ഈ സൂപ്പര്‍ പേസ് ബൌളര്‍. ഇന്ത്യക്കെതിരായ അവസാന ടെസ്റ്റ് മത്സരത്തിനിടെയാണ് ആര്‍ച്ചര്‍ക്ക് പരിക്കേല്‍ക്കുന്നത്. പിന്നീട് ട്വന്‍റി20 പരമ്പരയിലൂടെ മികച്ച തിരിച്ചു വരവ് നടത്തിയ ആര്‍ച്ചര്‍ തന്‍റെ കരിയർ ബെസ്റ്റായ 4/33 എന്ന പ്രകടനവും സ്വന്തമാക്കിയിരുന്നു. എന്നാല്‍ കൈമുട്ടിനേറ്റ പരിക്ക് ട്വന്‍റി ട്വന്‍റി പരമ്പരക്കിടെ വീണ്ടുംം വഷളാകുകയായിരുന്നു. ഇതിനെത്തുടര്‍ന്നാണ് ഇംഗ്ലണ്ട് ഏകദിന പരമ്പരക്കുള്ള ടീമില്‍ നിന്ന് താരത്തെ ഒഴിവാക്കിയത്.