അമേരിക്ക-ഇറാൻ ചർച്ച ഇന്ന് മസ്കത്തിൽ; ഭാവിചർച്ചകൾക്കുള്ള ചട്ടക്കൂടിന്​ രൂപം നൽകുമെന്ന് സ്റ്റിവ്​ വിറ്റ്കോഫ്

വാഷിംഗ്ടൺ: ഇറാനുമായി ഭാവിചർച്ചകൾക്കുള്ള ചട്ടക്കൂടിന്​ ഇന്ന്​ മസ്കത്തിൽ രൂപം നൽകുമെന്ന്​ അമേരിക്കയുടെ പശ്ചിമേഷ്യൻ പ്രതിനിധി സ്റ്റിവ്​ വിറ്റ്കോഫ്​. തുറന്ന മനസോടെയാണ്​ അമേരിക്കയുമായുള്ള ഇന്നത്തെ അനൗപചാരിക ചർച്ചയെ സമീപിക്കുകയെന്ന്​ ഇറാൻ അറിയിച്ചു.

ഒമാൻ തലസ്ഥാനമായ മസ്കത്തിൽ യുഎസ്​ പശ്​ചമേഷ്യൻ പ്രതിനിധി സ്റ്റിവ്​ വിറ്റ്​കോഫിന്‍റെയും ഇറാൻ വിദേശകാര്യ മന്ത്രി അബ്ബാസ്​ അറാഗ്​ഛിയുടെയും നേതൃത്വത്തിലാകും​ ഇന്ന്​ ചർച്ച. ഭാവി ചർച്ചക്കുള്ള ചട്ടക്കൂടിന്​ രൂപം നൽകുന്നതിനൊപ്പം ആണവ പദ്ധതി ഉപേക്ഷിക്കമെന്ന നിലപാടാകും ചർച്ചയിൽ താൻ ഉന്നയിക്കുകയെന്ന്​ സ്റ്റിവ്​ വിറ്റ്കോഫ്​ പറഞു. ആണവായുധം സ്വന്തമാക്കാൻ ഇറാനെ ഒരു നിലക്കും അനുവദിക്കില്ലെന്നും അദ്ദേഹം ആവർത്തിച്ചു. എന്നാൽ അമേരിക്കയുമായി തുറന്ന മനസോടെയുള്ള ചർച്ചയാണ്​ ആഗ്രഹിക്കുന്നതെന്നും ആണവായുധ നിർമാണത്തോട്​ ശക്​തമായ എതിർപ്പാണുള്ളതെന്നും ഇറാൻ നേതൃത്വം വ്യക്​തമാക്കി. ഭീഷണിയും അടി​ച്ചേൽപിക്കലും അംഗീകരിക്കില്ലെന്നും തെഹ്​റാൻ ചൂണ്ടിക്കാട്ടി. അതിനിടെ, ഇ​സ്രായേലും ഹമാസും തമ്മിലുള്ള വെടിനിർത്തൽ ചർച്ചയിലൂടെ ഗസ്സയിൽ യുദ്ധവിരാമം ഉണ്ടാകുമെന്ന്​ അമേരിക്കൻ പ്രസിഡന്‍റ്​ ഡോണൾഡ്​ ട്രംപ്​ പറഞ്ഞു. അധികം വൈകാതെ ബന്ദികൾ ഗസ്സയിൽ നിന്ന്​ ഇസ്രായേലിൽ തിരിച്ചെത്തുമെന്നും ട്രംപ്​ പ്രത്യാശ പ്രകടിപ്പിച്ചു.

59 ഇസ്രായേൽ ബന്ദികളാണ്​ ഹമാസ്​ പിടിയിലുള്ളതെന്നും ഇതിൽ 24 പേർ മാത്രമാണ്​ നിലവിൽ ജീവിച്ചിരിപ്പുള്ളതെന്നും ട​്രംപ്​ അറിയിച്ചു. ഗസ്സ യുദ്ധം അവസാനിപ്പിച്ച്​ ബന്ദികളുടെ മോചനം ഉടൻ നടപ്പാക്കണം എന്നാവശ്യപ്പെട്ട്​ സൈനികർക്ക്​ പിന്നാലെ ഡോക്ടർമാരും അക്കാദമിക്​ വിദഗ്​ധരും രംഗത്തു വന്നത്​ ഇസ്രായേൽ രാഷ്ട്രീയ നേതൃത്വത്തിന്​ തിരിച്ചടിയായി. വിരമിച്ചവരും റിസർവിലുള്ളവരുമായ 980 ഇസ്രായേലി യുദ്ധവിമാന പൈലറ്റുമാർ​ ഗസ്സ യുദ്ധത്തിനെതിരെ കഴിഞ്ഞ ദിവസം തുറന്ന കത്തെഴുതിയിരുന്നു. ഇതിനു പിന്നാലെയാണ്​ ഡോക്ടർമാര​ുടെയും അക്കാദമിക്​ വിദഗ്​ധരുടെയും രംഗപ്രവേശം. ഗസ്സയിൽ ഇന്നലെ ഇസ്രായേൽ നടത്തിയ ആക്രമണത്തിൽ 20 ഫലസ്​തീനികൾ കൊല്ലപ്പെട്ടു.