വാഹനങ്ങളുടെ ക്രാഷ് ടെസ്റ്റിന് ഭാരത് എൻകാപ്പ് വരുന്നു; കരട് വിജ്ഞാപനത്തിന് അംഗീകാരം

വാഹനങ്ങളുടെ ക്രാഷ് ടെസ്റ്റും അതിന് ശേഷം ലഭിക്കുന്ന സേഫ്റ്റി റേറ്റിങും ഇന്ത്യൻ കാർ വിപണിയിൽ ഇന്നും കമ്പനികൾ തമ്മിൽ തർക്കം നടക്കുന്ന മേഖലയാണ്. നിലവിൽ ഇന്ത്യൻ കാറുകളുടെ ക്രാഷ് ടെസ്റ്റുകൾ നടത്തുന്നത് വിദേശ കാർ ഏജൻസികളായ ഗ്ലോബൽ എൻകാപ്പ് (GNCAP), യൂറോ എൻകാപ്പ് എന്നിവയാണ്. ഇന്ത്യൻ സാഹചര്യങ്ങൾക്ക് അനുസൃതമായി ഇന്ത്യക്ക് വേണ്ടി ഒരു തദ്ദേശീയമായ ക്രാഷ് ടെസ്റ്റ് ഏജൻസി ആരംഭിക്കണമെന്ന ആവശ്യം 2016 മുതൽ ചർച്ചായായിരുന്നു.

ഇപ്പോൾ ഭാരത് എൻകാപ്പ് ( Bharath New Car Assesment Programme ) എന്ന പേരിലുള്ള ക്രാഷ് ടെസ്റ്റ് പ്രോഗ്രാം ആരംഭിക്കാനുള്ള കരട് വിജ്ഞാപനത്തിന് കേന്ദ്ര ഉപരിതല ഗതാഗതമന്ത്രി നിതിൻ ഗഡ്കരി അംഗീകാരം നൽകിയിരിക്കുകയാണ്.

ഉപഭോക്താക്കളെ ആവശ്യങ്ങൾ പരിഗണിച്ചാണ് ഭാരത് എൻകാപ്പ് രൂപകൽപ്പന ചെയ്യുന്നതെന്ന് നിതിൻ ഗഡ്കരി നേരത്തെ വ്യക്തമാക്കിയിരുന്നു.

ടയറിനും മൈലേജ് വരുന്നു; റേറ്റിങ് കൂടിയാൽ 10 ശതമാനം വരെ ഇന്ധനക്ഷമത കൂടും

ഒരു വാഹനം വാങ്ങുമ്പോൾ നമ്മൾ ആദ്യം ചോദിക്കുന്ന ചോദ്യങ്ങളിലൊന്നാണ് മൈലേജ് എത്ര കിട്ടുമെന്നുള്ളത്. ഒരു വാഹനത്തിന്റെ ഭാവി തന്നെ നിർണയിക്കുന്ന പ്രധാനപ്പെട്ട ചോദ്യവുമാണത്. പ്രത്യേകിച്ചു ഇന്ധനവില ഇത്രയും ഉയർന്നു നിൽക്കുന്ന സമയത്ത്.

എന്നാൽ ഇനിമുതൽ വാഹനം വാങ്ങുമ്പോൾ മാത്രമല്ല വാഹനത്തിന്റെ ടയറുകൾ വാങ്ങുമ്പോഴും ഇതിനെത്രെ മൈലേജ് എന്ന് ചോദിക്കേണ്ടി വരും. വൈദ്യുത ഉപകരണങ്ങളുടേത് പോലെ ഇനി ടയറുകൾക്കും സ്റ്റാർ റേറ്റിങ് നൽകാൻ ആരംഭിച്ചിരിക്കുകയാണ് ബ്യൂറോ ഓഫ് എനർജി എഫിഷ്യൻസി (BEE) . പ്രസ്തുത ടയർ ഉപയോഗിച്ചാൽ ഇന്ധന ഉപയോഗത്തിലുണ്ടാകുന്ന മാറ്റം കണക്കാക്കിയാണ് ഒന്നുമുതൽ അഞ്ച് വരെയുള്ള സ്റ്റാർ റേറ്റിങ് നൽകുക.

ടയറിന്റെ റോളിങ് റെസിസ്റ്റൻസ് കോ എഫിഷ്യന്റാണ് ഇതിനുവേണ്ടി പരിശോധിക്കുക. എന്നുവച്ചാൽ ടയറിന്റെ റോളിങ് ( അനാവശ്യമായ കറക്കം) കുറഞ്ഞു നിന്നാൽ ഉയർന്ന സ്റ്റാർ റേറ്റിങ് ലഭിക്കും. അഞ്ച് സ്റ്റാറാണ് ഏറ്റവും ഉയർന്ന നിലവാരം ഒരു സ്റ്റാറാണ് ഏറ്റവും താഴ്ന്ന നിലവാരം. 5 സ്റ്റാർ റേറ്റിങ് ലഭിച്ച ടയറുകൾക്ക് കുറഞ്ഞ നിലവാരമുള്ള ടയറുകളേക്കാൾ 9.5 ശതമാനം ഇന്ധനക്ഷമത കൂടുമെന്നാണ് കണക്ക്. മാത്രമല്ല 5 സ്റ്റാർ റേറ്റിങ് ലഭിച്ച ടയറുകൾ ഹരിതഗൃഹ വാതകങ്ങളുടെ ബഹിർഗമനവും കുറക്കും. മറ്റുള്ള ടയറുകളേക്കാൾ 750 കിലോ ഗ്രാം കാർബൺ ഡൈ ഓക്സൈഡ് ബഹിർഗമനം കുറക്കുമെന്നാണ് കണക്കാക്കുന്നത്.

ഗൃഹോപകരണങ്ങൾക്ക് നൽകും പോലെ സ്റ്റാർ റേറ്റിങുള്ള സ്റ്റിക്കർ ടയറുകളിലും പതിക്കും. ടയർ ത്രെഡ് പാറ്റേൺ, ബ്രാൻഡ്, മോഡൽ, വർഷം, സൈസ്, ക്ലാസ് എന്നിവയോടൊപ്പമാണ് സ്റ്റാർ റേറ്റിങും നൽകുക. റേറ്റിങ് ആരംഭിച്ചതിന് ശേഷം ആദ്യമായി 5 സ്റ്റാർ റേറ്റിങ് ലഭിച്ചിരിക്കുന്നത് മിച്ചലിന്റെ ലാറ്റിറ്റിയുഡ് സ്പോർട് 3 എന്ന എസ്.യു.വി ടയറുകൾക്കാണ്.

നിലവിൽ ഈ റേറ്റിങ് നിർബന്ധമാക്കിയിട്ടില്ല. എന്നാൽ വരും മാസങ്ങളിൽ ടയറുകൾക്ക് സ്റ്റാർ റേറ്റിങ് നിർബന്ധമാക്കുമെന്നാണ് സൂചന.