കുതിച്ചുപായാൻ 'ഉറുസ് പെർഫോമെന്റെ'; സൂപ്പർ എസ്‌യുവി അവതരിപ്പിച്ച് ലംബോർഗിനി

ഇറ്റാലിയൻ സ്‌പോർട്സ് കാർ നിർമാതാക്കളായ ലംബോർഗിനി തങ്ങളുടെ ഏറ്റവും പുതിയ സൂപ്പർ എസ്‌യുവിയായ ഉറൂസ് പെർഫോമന്റെ അവതരിപ്പിച്ചു. ഏകദേശം 2.07 കോടി രൂപയാണ് വില. വാഹനത്തിന്റെ ഡെലിവറി ഈ വർഷം അവസാനത്തോടെ ആരംഭിക്കുമെന്ന് നിർമാതാക്കൾ പറയുന്നു. വാഹനം ഇന്ത്യയിൽ ഇതുവരെ ലോഞ്ച് ചെയ്തിട്ടില്ല.

നിലവിലുള്ള ഉറൂസിന്റെ അതേ എൻജിനുമായാണ് വരുന്നതെങ്കിലും പെർഫോമൻസിൽ കാര്യമായ പരിഷ്‌ക്കാരവുമായാണ് പുത്തൻ വേരിയന്റ് വിപണി കീഴടക്കാൻ എത്തിയിരിക്കുന്നത്. 4.0 ലിറ്റർ ട്വിൻ-ടർബോചാർജ്ഡ് V8 എഞ്ചിൻ തന്നെയാണ് ഉറൂസ് പെർഫോമന്റെയ്ക്കും തുടിപ്പേകുന്നതെങ്കിലും ഇത് 666 bhp കരുത്ത് ഉത്പാദിപ്പിക്കാൻ പ്രാപ്തമാണ്. അതായത് സ്റ്റാൻഡേർഡ് വേരിയന്റിനേക്കാൾ 16 bhp പവറാണ് ഈ സ്‌പെഷ്യൽ പതിപ്പിനുള്ളത്. 850Nm ടോർക്ക് കണക്കിൽ മാറ്റമില്ല.

വർധിച്ച കരുത്തിനൊപ്പം, സൂപ്പർ-എസ്യുവിക്ക് 0-100 കിലോമീറ്റർ വേഗത വെറും 3.3 സെക്കൻഡിനുള്ളിൽ കൈവരിക്കാൻ കഴിയും. കൂടാതെ മണിക്കൂറിൽ പരമാവധി 306 കി.മീ. വേഗതയിൽ സഞ്ചരിക്കാനും പുതിയ ഉറൂസ് പെർഫോമന്റെയ്ക്ക് സാധിക്കും

അടുത്ത വർഷം തുടക്കത്തോടെ ഈ സ്‌പോർട്സ് യൂട്ടിലിറ്റി വാഹനത്തെ ഇന്ത്യയിലും പുറത്തിറക്കിയേക്കുമെന്നാണ് പ്രതീക്ഷിക്കുന്നത്. നിലവിൽ ഇന്ത്യയിൽ ഉറൂസിന് മികച്ച സ്വീകാര്യത ലഭിക്കുന്നുണ്ട്.