തങ്കത്തിളക്കത്തിന് എക്‌സ് യുവി ഗോള്‍ഡ് എഡിഷന്‍; പാരാലിംപിക്സ് സ്വര്‍ണ മെഡല്‍ ജേതാവിന് കാര്‍ സമ്മാനിച്ച് മഹീന്ദ്ര

ടോക്യോ പാരാലിംപിക്‌സ് സ്വർണ്ണ മെഡൽ ജേതാവ് അവനി ലെഖാരക്ക് എക്‌സ് യുവി 700 സമ്മാനിച്ച് മഹീന്ദ്ര. പാരാലിംപിക്‌സിൽ പത്ത് മീറ്റർ എയർ റൈഫിൾസിലാണ് അവനി സ്വർണ്ണ മെഡൽ കരസ്ഥമാക്കിയത്. പാരാലിംപിക്‌സിലും ഒളിമ്പിക്‌സിലും സ്വർണ്ണം നേടിയ താരങ്ങൾക്ക് മഹീന്ദ്ര എക്‌സ് യുവി 700 നൽകുമെന്ന് നേരത്തെ പ്രഖ്യാപിച്ചിരുന്നു. പാരാലിംപിക്സ് 50 മീറ്റര്‍ എയര്‍ റൈഫിൾസില്‍ അവനി വെങ്കലവും നേടിയിരുന്നു.

ജന്മനാ ശാരീരിക വൈകല്യങ്ങളുള്ള അവനി ലെഖാരക്ക് വാഹനത്തിൽ കയറാൻ പ്രത്യേക സൗകര്യങ്ങൾ മഹീന്ദ്ര ഒരുക്കിയിട്ടുണ്ട്. സ്വർണ്ണ മെഡൽ ജേതാക്കൾക്കായി മഹീന്ദ്ര പ്രത്യേകം രൂപകൽപ്പന ചെയ്തതാണ് എക്‌സ് യുവി 700 ഗോൾഡ് എഡിഷൻ. മഹീന്ദ്ര ലോഗോയിലും മുൻവശത്തും പിൻവശത്തുമൊക്കെ സ്വർണസ്പർശമുണ്ട്.

നേരത്തെ ഒളിമ്പിക്സിൽ ജാവലിൻ ത്രോയിൽ സ്വർണം നേടിയ നീരജ് ചോപ്ര, പാരാലിംപിക്‌സ് ജാവലിൻ ത്രോയിൽ സ്വർണം നേടിയ സുമിത് ആന്റിൽ എന്നിവർക്കും മഹീന്ദ്ര എക്‌സ് യുവി 700 ഗോൾഡ് എഡിഷൻ നൽകിയിരുന്നു