പിങ്ക് ജഴ്സിയില്‍ ആദ്യ രണ്ടുറപ്പിക്കാൻ ഗുജറാത്ത്; ആശ്വാസജയത്തിന് ഹൈദരാബാദ്

അഹ്മദാബാദ്: ഐ.പി.എല്ലിൽ ലീഗ് പോരാട്ടത്തിന്റെ അവസാനഘട്ടത്തിലെത്തിയിട്ടും പ്ലേഓഫ് ടീമുകളുടെ കാര്യത്തിൽ അനിശ്ചിതത്വം തുടരുന്നതിനിടെ ഗുജറാത്ത് ഇന്ന് ഹൈദരാബാദിനെ നേരിടുന്നു. അഹ്മദാബാദിൽ തങ്ങളുടെ ഹോംഗ്രൗണ്ടിൽ നടക്കുന്ന മത്സരത്തിൽ ജയത്തിലൂടെ പ്ലേഓഫിൽ ആദ്യ രണ്ട് സ്ഥാനം ഉറപ്പിക്കാനായിരിക്കും ഗുജറാത്ത് ടൈറ്റൻസ് ഇന്ന് നോക്കുക. പോയിന്റ് ടേബിളിലെ കരുത്തന്മാരെ മലർത്തിയടിച്ച് ആശ്വാസജയം നേടാനായിരിക്കും മറുവശത്ത് ഏറെക്കുറെ സാധ്യതകൾ അവസാനിച്ച ഹൈദരാബാദിന്റെ ശ്രമം.

മത്സരത്തിൽ ടോസ് ലഭിച്ച് ബൗളിങ് തിരഞ്ഞെടുത്തിരിക്കുകയാണ് ഹൈദരാബാദ് നായകൻ ഐഡൻ മാർക്രാം. രണ്ട് മാറ്റങ്ങളുമായാണ് ഗുജറാത്ത് ഇന്ന് ഇറങ്ങുന്നത്. ദാസുൻ ഷനക ഇന്ന് ഗുജറാത്തിനായി അരങ്ങേറ്റം കുറിക്കും. നെറ്റ്‌സിൽ പരിശീലനത്തിനിടെ പരിക്കേറ്റ വിജയ് ശങ്കറിനു പകരം സായ് സുദർശനം എത്തും. പിങ്ക് ജഴ്സിയിലാണ് ഗുജറാത്ത് ഇന്ന് ഇറങ്ങുന്നതെന്ന കൌതുകം കൂടിയുണ്ട്.

ഹൈദരാബാദിൽ ഗ്ലെൻ ഫിലിപ്‌സിനു പകരം മാർക്കോ യാൻസൻ ആദ്യ ഇലവനിൽ ഇടംപിടിച്ചു. മറ്റു മാറ്റങ്ങളൊന്നും ഹൈദരാബാദ് സംഘത്തിലില്ല.