പൊലീസ് ഉദ്യോഗസ്ഥയെ പിന്തുടര്‍ന്ന് വാള്‍ വീശി ഭീഷണിപ്പെടുത്തി: മൂന്നു പേര്‍ അറസ്റ്റില്‍

ഭുവനേശ്വര്‍: പൊലീസ് ഉദ്യോഗസ്ഥയെ പിന്തുടരുകയും വാള്‍ വീശി ഭീഷണിപ്പെടുത്തുകയും അസഭ്യം പറയുകയും ചെയ്ത മൂന്ന് പേര്‍ അറസ്റ്റില്‍. നൈറ്റ് ഡ്യൂട്ടി കഴിഞ്ഞ് കാറില്‍ മടങ്ങുകയായിരുന്ന പൊലീസ് ഉദ്യോഗസ്ഥയ്ക്ക് നേരെയാണ് അതിക്രമമുണ്ടായത്.

ജനുവരി 2ന് രാത്രി ജോലി കഴിഞ്ഞ് മടങ്ങവേ സയൻസ് പാർക്ക് പ്രദേശത്തിന് സമീപമാണ് സംഭവമുണ്ടായത്. കാറില്‍ മൂന്നംഗ സംഘം തന്നെ പിന്തുടര്‍ന്ന് അസഭ്യം പറയുകയായിരുന്നെന്ന് ഭുവനേശ്വറിലെ മഹിളാ പൊലീസ് സ്‌റ്റേഷനിലെ സബ് ഇൻസ്‌പെക്ടർ ശുഭശ്രീ നായക് പറഞ്ഞു. ഇതോടെ ശുഭശ്രീ കാര്‍ പൊലീസ് റിസര്‍വ് ഗ്രൌണ്ടിലേക്ക് തിരിച്ചുവിട്ടു. തുടര്‍ന്ന് മൂന്ന് പേരില്‍ ഒരാള്‍ വാളെടുത്ത് കാണിച്ച് കൊല്ലുമെന്ന് ഭീഷണിപ്പെടുത്തി. താന്‍ അറിയിച്ചതിനു പിന്നാലെ പൊലീസുകാര്‍ സ്ഥലത്തെത്തിയതോടെ കാറിലുണ്ടായിരുന്നവര്‍ സ്ഥലം വിട്ടെന്നും ശുഭശ്രീ പറഞ്ഞു.

പൊലീസ് ഉദ്യോഗസ്ഥയെ പിന്തുടര്‍ന്ന വാഹനം തിരിച്ചറിഞ്ഞു. പിന്നാലെ മൂന്നു പേരെയും ഭുവനേശ്വറിന്‍റെ വിവിധ ഭാഗങ്ങളില്‍ നിന്നായി അറസ്റ്റ് ചെയ്തെന്ന് ഡിസിപി പ്രതീക് സിങ് പറഞ്ഞു. മൂന്നു പേരും ടാക്സി ഡ്രൈവർമാരാണ്.

Summary- The police on Thursday arrested three taxi drivers on charges of chasing, hurling abuses and threatening a woman police officer with a sword while she was returning home in her car after night duty in Bhubaneswar