ബി.ജെ.പി നേതാവിന്റെ വീടിന് പിന്നിൽ യുവതിയെ കൊന്ന് കുഴിച്ചിട്ട നിലയിൽ

മുംബൈ: ബി.ജെ.പി നേതാവിന്റെ വസതിക്ക് പിന്നിൽ യുവതിയെ കൊന്ന് കുഴിച്ചിട്ട നിലയിൽ കണ്ടെത്തി. മഹാരാഷ്ട്ര സതാര ജില്ലയിൽ നിന്നുള്ള മുൻ എം.എൽ.സിയായ കാന്ത നലവാഡെയുടെ വീടിന് പിറകിലാണ് മൃതദേഹം കണ്ടെത്തിയത്.

അടച്ചിട്ട വീടിന്റെ പിൻഭാ​ഗം വൃത്തിയാക്കുന്നതിനിടെയാണ് വീട്ടുകാർ മൃതദേഹം കണ്ടത്. ഇടയ്ക്കിടയ്ക്കാണ് തങ്ങൾ ഈ ബം​ഗ്ലാവിൽ വന്ന് താമസിക്കുന്നതെന്ന് കുടുംബാ​ഗങ്ങൾ പറയുന്നു.

"ഒരു സ്ത്രീയുടെ വികൃതവും അഴുകിയതുമായ മൃതദേഹം ബംഗ്ലാവിന്റെ പിൻഭാ​ഗത്ത് ഭാഗികമായി കുഴിച്ചിട്ട നിലയിൽ കണ്ടെത്തുകയായിരുന്നു. വെള്ളിയാഴ്ച വീട്ടുകാർ അവിടെയെത്തി വൃത്തിയാക്കാൻ തുടങ്ങിയപ്പോഴാണ് ഇത് കണ്ടെത്തിയത്"- ഒരു പൊലീസ് ഉദ്യോഗസ്ഥൻ പറഞ്ഞു.

ഉടൻ വീട്ടുകാർ പൊലീസിനെ വിവരമറിയിക്കുകയായിരുന്നെന്നും അന്വേഷണം തുടങ്ങിയിട്ടുണ്ടെന്നും അദ്ദേഹം പറഞ്ഞു. മരിച്ച സ്ത്രീ ആരാണെന്ന് ഇനിയും കണ്ടെത്താനായിട്ടില്ലെന്നും അദ്ദേഹം വ്യക്തമാക്കി.

ബം​ഗ്ലാവിന്റെ പിന്നിൽ നിന്നും സ്ത്രീയുടെ മൃതദേഹം കണ്ടെത്തിയതുമായി ബന്ധപ്പെട്ട് എല്ലാ വശവും അന്വേഷിക്കുമെന്ന് സതാര പൊലീസ് സൂപ്രണ്ട് സമീർ ഷെയ്ഖ് അറിയിച്ചു. മരിച്ച സ്ത്രീയുടെ പേരു വിവരങ്ങൾ ഉടൻ പുറത്തുവിടുമെന്നും അന്വേഷണം ആരംഭിച്ചിട്ടുണ്ടെന്നും അദ്ദേഹം കൂട്ടിച്ചേർത്തു.

കഴിഞ്ഞയാഴ്ച, മധ്യപ്രദേശിലെ കോൺ​ഗ്രസ് എം.എൽ.എയുടെ ബം​ഗ്ലാവിൽ വിദ്യാർഥിയെ തൂങ്ങിമരിച്ച നിലയിൽ കണ്ടെത്തിയിരുന്നു. ഡിൻദോരി മണ്ഡലത്തിൽ നിന്നുള്ള നിയമസഭാം​ഗമായ ഓംകാർ സിങ് മർകമിന്റെ ശ്യാമള ഹിൽസിലെ ഔദ്യോ​ഗിക വസതിയിലാണ് വിദ്യാർഥിയെ മരിച്ച നിലയിൽ കണ്ടെത്തിയത്.

ഇവിടെ നിന്ന് പഠിക്കുന്ന 22കാരനായ തിരത് സിങ് എന്ന വിദ്യാർഥിയാണ് മരണപ്പെട്ടത്. പ്രഥമദൃഷ്ട്യാ ആത്മഹത്യയാണെന്നാണ് നി​ഗമനമെന്ന് പൊലീസ് അറിയിച്ചു. അർബുദ ബാധിതനായിരുന്ന വിദ്യാർഥിയെന്നും മൃതദേഹത്തിന്റെ സമീപത്തു നിന്ന് ആത്മഹത്യാക്കുറിപ്പ് കണ്ടെടുത്തിട്ടുണ്ടെന്നും പൊലീസ് പറഞ്ഞു.