യുഎസിൽനിന്ന് നാടുകടത്തുന്ന​ 119 ഇന്ത്യക്കാരുമായി രണ്ടാമത്​​ വിമാനം നാളെയെത്തും

ന്യൂഡൽഹി: അമേരിക്കയിൽനിന്ന് നാടുകടത്തുന്ന ഇന്ത്യക്കാരെയും വഹിച്ചുള്ള രണ്ടാമത്​ വിമാനം ശനിയാഴ്ച പഞ്ചാബിലെ അമൃത്സറിൽ ഇറങ്ങും. 119 പേരാണ്​​ വിമാനത്തിൽ ഉണ്ടാവുക. ഇതിൽ 67 പേരും പഞ്ചാബിൽനിന്നുള്ളവരാണ്​. ഹരിയാനയിൽനിന്ന് 33 പേർ, ഗുജറാത്തിൽനിന്ന് എട്ട് പേർ, ഉത്തർപ്രദേശിൽനിന്ന് മൂന്ന് പേർ, മഹാരാഷ്ട്ര, രാജസ്ഥാൻ എന്നിവിടങ്ങളിൽനിന്ന് രണ്ട് പേർ വീതം, ഗോവ, ഹിമാചൽ പ്രദേശ്, ജമ്മു കശ്മീർ എന്നിവിടങ്ങളിൽനിന്ന് ഓരോ യാത്രക്കാരനും ഉണ്ടാകും. നാടുകടത്തപ്പെട്ടവരെ കൊണ്ടുവരുന്ന മറ്റൊരു വിമാനം ഞായറാഴ്ചയെത്തുമെന്ന്​ പ്രതീക്ഷിക്കുന്നുണ്ട്​.

നാടുകടത്തുന്നവരെ യുഎസ് വിമാനത്തിൽ കൊണ്ടുവരുമോ അതോ ഇന്ത്യൻ സർക്കാർ അവരെ തിരികെ കൊണ്ടുവരാൻ വിമാനം ക്രമീകരിച്ചിട്ടുണ്ടോ എന്നതിൽ വ്യക്തതയില്ല. ഫെബ്രുവരി അഞ്ചിന് 104 ഇന്ത്യക്കാരെ വഹിച്ചുകൊണ്ട് യുഎസ്​ എയർഫോഴ്​സിന്‍റെ സി-17 വിമാനം അമൃത്സറിൽ വന്നിറിങ്ങിയിരുന്നു. അതിൽ ഭൂരിഭാഗവും ഹരിയാന, ഗുജറാത്ത്, പഞ്ചാബ് എന്നിവിടങ്ങളിൽ നിന്നുള്ള യാത്രക്കാരായിരുന്നു. ഇവരെ ചങ്ങലകളിൽ ബന്ധിപ്പിച്ച്​​ കൊണ്ടുവന്നത്​ വലിയ വിമർശനത്തിന്​ ഇടയാക്കുകയുണ്ടായി. ശനിയാഴ്ച വരുന്ന സംഘത്തെ ചങ്ങലകളിൽ ബന്ധിച്ചായിരിക്കില്ല കൊണ്ടുവരികയെന്ന്​ പ്രതീക്ഷിക്കുന്നതായി വിവിധ വൃത്തങ്ങളെ ഉദ്ധരിച്ചുകൊണ്ട്​ ദേശീയ മാധ്യമങ്ങൾ റിപ്പോർട്ട്​ ചെയ്യുന്നു.

നാടുകടത്തപ്പെട്ടവരോടുള്ള​ മനുഷ്യത്വരഹിതമായ സമീപന​ത്തിനെതിരെ പാർലമെന്‍റിലടക്കം പ്രതിപക്ഷം രംഗത്തുവന്നിരുന്നു. തുടർന്ന്​ ഈ വിഷയം അമേരിക്കൻ സർക്കാരുമായി ചർച്ച ചെയ്യുമെന്ന് വിദേശകാര്യ മന്ത്രി അറിയിക്കുകയുണ്ടായി. പ്രധാനമന്ത്രി നരേന്ദ്ര മോദിയുടെ ഇന്നലത്തെ യുഎസ് സന്ദർശന വേളയിലും നിയമവിരുദ്ധ കുടിയേറ്റ വിഷയം പ്രസിഡന്‍റ്​ ഡൊണാൾഡ് ട്രംപുമായി ചർച്ച ചെയ്തിരുന്നു.

രണ്ടാമത്തെ വിമാനം ശനിയാഴ്ച രാത്രി 10നും 11നും ഇടയിൽ അമൃത്സർ അന്താരാഷ്ട്ര വിമാനത്താവളത്തിൽ എത്തുമെന്നാണ്​ പ്രതീക്ഷിക്കുന്നത്​. ആദ്യ വിമാനത്തിൽ നാടുകടത്തപ്പെട്ടവരിൽ ഭൂരിഭാഗവും യുഎസിലേക്ക് പ്രവേശിക്കാൻ നിയമവിരുദ്ധമായ വഴി സ്വീകരിച്ചവരായിരുന്നു. പലരും ഏജന്‍റുമാർക്ക് വലിയ തുക നൽകിയശേഷം മാസങ്ങൾ നീണ്ടുനിൽക്കുന്ന യാത്രകൾ നടത്തിയാണ്​ അമേരിക്കയിലെത്തിയത്​. ഇവർ തിരിച്ചെത്തിയശേഷം പഞ്ചാബ്, ഹരിയാന സർക്കാരുകൾ നിരവധി ഏജന്‍റുമാരെ അറസ്റ്റ് ചെയ്തിട്ടുണ്ട്.