ഹൈദരാബാദിൽ നാല് വയസുകാരനെ തെരുവ് നായകൾ കടിച്ചുകൊന്നു

ഹൈദരാബാദ്: ഹൈദരാബാദിൽ നാല് വയസുകാരനെ തെരുവ് നായകൾ കടിച്ചുകീറി കൊന്നു. നിസാമാബാദ് സ്വദേശിയായ ഗംഗാധറിന്റെ മകൻ പ്രദീപിനെയാണ് നായകൾ ആക്രമിച്ചു കൊലപ്പെടുത്തിയത്. ഞായറാഴ്ച വൈകീട്ടാണ് സംഭവം. ഇതിന്റെ സി.സി.ടി.വി ദൃശ്യങ്ങൾ പുറത്തുവന്നിട്ടുണ്ട്.

ഓട്ടോമൊബൈൽ വർക്ക്‌ഷോപ്പിലെ വാച്ച്മാനാണ് ഗംഗാധർ. ഞായറാഴ്ച കുട്ടികളെ തന്റെ കടയിലേക്ക് കൊണ്ടുവന്ന ഗംഗാധർ അവരെ സമീപത്ത് കളിക്കാൻ വിട്ടതായിരുന്നു. കരച്ചിൽ കേട്ട് ഓടിയെത്തിയ ഗംഗാധർ നായ്ക്കളെ ഓടിച്ച് കുട്ടിയെ ഉടൻ തന്നെ സമീപത്തെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

നായ്ക്കൾ കുട്ടിയുടെ നേരെ ചാടി വീഴുന്നതും രക്ഷപ്പെടാനായി കുട്ടി എഴുന്നേറ്റ് ഓടാൻ ശ്രമിക്കുന്നതിന്റെ ദൃശ്യങ്ങൾ സി.സി.ടി.വിയിലുണ്ട്. ഇത്തരം സംഭവങ്ങൾ ആവർത്തിക്കപ്പെടാതിരിക്കാൻ നടപടി സ്വീകരിക്കുമെന്ന് നഗരവികസനകാര്യ മന്ത്രി കെ.ടി രാമറാവു പറഞ്ഞു.