'മുസ്‌ലിം യുവാക്കൾ പേരുമാറ്റി ഗർബ ആഘോഷത്തില്‍; ഹിന്ദു പെൺകുട്ടികളെ മതംമാറ്റാൻ ശ്രമം'-വിദ്വേഷ പ്രചാരണവുമായി ആജ് തക് ടി.വി

ന്യൂഡൽഹി: നവരാത്രിയുടെ ഭാഗമായി നടക്കുന്ന ഗർബ നൃത്താഘോഷ പരിപാടികളില്‍ മുസ്‌ലിം യുവാക്കൾ പേരുമാറി എത്തുന്നുവെന്ന് ആരോപണവുമായി ദേശീയ മാധ്യമമായ ആജ് തക് ടി.വി. 'ലൗ ജിഹാദി'ന്റെ ഭാഗമായാണ് ഇവര്‍ എത്തുന്നതെന്നും ചാനൽ പ്രക്ഷേപണം ചെയ്ത റിപ്പോർട്ടിൽ പറയുന്നു. ആജ് തക് കൺസൾട്ടിങ് എഡിറ്റർ സുധീർ ചൗധരിയാണ് എക്‌സ്‌ക്ലൂസീവ് റിപ്പോർട്ട് എന്ന പേരിൽ ഗുരുതര ആരോപണങ്ങൾ ഉന്നയിക്കുന്നത്.

നവരാത്രി ആഘോഷങ്ങളുടെ ഭാഗമായി നടക്കുന്ന നൃത്തങ്ങളാണ് ഗർബയും ഡാണ്ടിയയും. രണ്ടും ഹിന്ദു ആചാരത്തിന്റെ ഭാഗമാണ്. എന്നാൽ, നൃത്തം ചെയ്യലിന് വിലക്കുള്ള മതക്കാർ എന്തിനാണ് അവയിൽ പങ്കെടുക്കുന്നത്?-റിപ്പോർട്ടിൽ സുധീർ ചോദിക്കുന്നു.

നിരോധനം വേണമെന്നല്ല പറയുന്നത്. എന്നാൽ, മുസ്‌ലിം യുവാക്കൾ ഹിന്ദു പേര് വച്ച് ഇത്തരം ഉത്സവങ്ങൾക്കു പോകുന്നുണ്ട്. അതുവഴി ഹിന്ദു പെൺകുട്ടികളുമായി സൗഹൃദമുണ്ടാക്കുകയാണ് ലക്ഷ്യം. ഏതെങ്കിലും മുസ്‌ലിം പെൺകുട്ടികൾ പേരുമാറ്റി ഇത്തരം ഉത്സവങ്ങളിൽ പങ്കെടുക്കുന്നത് കണ്ടിട്ടുണ്ടോ? മുസ്‌ലിം പെൺകുട്ടികൾ എന്തുകൊണ്ടാണ് ഹിന്ദു പേരിൽ അവിടെ പോകുന്നില്ല? മുസ്‌ലിം സമുദായക്കാർ തങ്ങളുടെ സ്ത്രീകൾക്ക് എന്തിനാണ് ഹിജാബ് നിർബന്ധമാക്കിയത്? അവരെ പർദയിൽ തന്നെ നിർത്തുന്നത് എന്തിനാണ്? ഗർബ ആഘോഷത്തിനെത്തി മുസ്‌ലിം യുവാക്കൾ ഹിന്ദു പെൺകുട്ടികളുമായി സൗഹൃദമുണ്ടാക്കുകയാണെന്നും സുധീർ ആരോപിക്കുന്നുണ്ട്.

ഗർബ ആഘോഷങ്ങളിൽനിന്ന് നേരിട്ടുള്ള വിവരങ്ങൾ എന്നു പറഞ്ഞാണ് റിപ്പോർട്ട് പുറത്തുവിട്ടത്. ലൗ ജിഹാദിന്റെ ഭാഗമായാണ് ഇത്തരത്തിൽ മുസ്‌ലിം യുവാക്കൾ പേരുമാറ്റി എത്തുന്നത്. ഹിന്ദു പെൺകുട്ടികളെ മതംമാറ്റാനാണ് നീക്കമെന്നും ഇതിൽ പറയുന്നു.

ഗുജറാത്തിൽ നവരാത്രിയുടെ ഭാഗമായി നടക്കുന്ന ഗർബ ആഘോഷ വേദികളിൽ ലൗ ജിഹാദ് നടക്കുന്നുണ്ടെന്നും ഇത് തടയാൻ നടപടികളുണ്ടാകുമെന്നും ദിവസങ്ങൾക്കുമുൻപ് ബജ്രങ്ദൾ മുന്നറിയിപ്പ് നൽകിയിരുന്നു. കഴിഞ്ഞ ദിവസം നടന്ന ആഘോഷ പരിപാടികളിൽ ബോധവൽക്കരണത്തിനെന്ന പേരിൽ മുന്നറിയിപ്പുമായി ലഘുലേഖകളും വിതരണം ചെയ്തിരുന്നു. മധ്യപ്രദേശിലെ ഉജ്ജയിനിൽ മൂന്നു മുസ്‌ലിം യുവാക്കളെ ഗർബവേദിയിൽനിന്ന് പിടിച്ച് ഒരു സംഘം ആക്രമിക്കുന്ന ദൃശ്യങ്ങൾ പുറത്തുവന്നിട്ടുണ്ട്.

Summary: Sudhir Chaudhary, Aaj Tak TV Consulting Editor, has alleged that Muslim youths come under Hindu names for the garba dance celebrations held as part of Navratri and try to convert Hindu girls.