ബി.ജെ.പിയില്‍ നിന്നും കാലിയായ ഖജനാവാണ് ലഭിച്ചതെന്ന് ഹിമാചല്‍ മുഖ്യമന്ത്രി
ബി.ജെ.പി എടുത്ത അപ്രതീക്ഷിത തീരുമാനങ്ങൾ അനാവശ്യമായിരുന്നെന്ന് സുഖു ആരോപിച്ചു
സുഖ്‌വീന്ദർ സിംഗ് സുഖു
ഷിംല: മുന്‍ ബി.ജെ.പി സര്‍ക്കാര്‍ കോണ്‍ഗ്രസിന് കാലിയായ ഖജനാവാണ് നല്‍കിയതെന്ന് ഹിമാചൽ പ്രദേശ് മുഖ്യമന്ത്രി സുഖ്‌വീന്ദർ സിംഗ് സുഖു. കഴിഞ്ഞ ബി.ജെ.പി സർക്കാർ ജീവനക്കാർക്ക് ശമ്പള കമ്മീഷൻ പ്രഖ്യാപിച്ചിരുന്നെങ്കിലും കുടിശ്ശിക നൽകുന്നതിൽ പരാജയപ്പെട്ടെന്ന് ഉനയിൽ ചൊവ്വാഴ്ച മാധ്യമങ്ങളോട് സംസാരിക്കവെ അദ്ദേഹം പറഞ്ഞു.
ബി.ജെ.പി എടുത്ത അപ്രതീക്ഷിത തീരുമാനങ്ങൾ അനാവശ്യമായിരുന്നെന്ന് സുഖു ആരോപിച്ചു. ''എല്ലാ വ്യാജ വാഗ്ദാനങ്ങളും രാഷ്ട്രീയ നേട്ടം കൊയ്യാനായിരുന്നു. 11,000 കോടിയുടെ പെന്‍ഷന്‍ കുടിശ്ശികയാണുള്ളത്. അതുപോലെ ക്ഷാമബത്തയും പ്രഖ്യാപിച്ചെങ്കിലും ജീവനക്കാർക്ക് നൽകിയില്ല'' അദ്ദേഹം ആരോപിച്ചു. പഴയ പെൻഷൻ പദ്ധതി പ്രഖ്യാപിക്കുന്നതിന് മുമ്പ് ആവശ്യമായ ബജറ്റ് വ്യവസ്ഥകൾ തയ്യാറാക്കിയിരുന്നതായി ഹിമാചൽ മുഖ്യമന്ത്രി പറഞ്ഞു."വിവിധ തലങ്ങളിലെ ശ്രദ്ധാപൂർവമായ ആലോചനകൾക്ക് ശേഷമാണ് മന്ത്രിസഭയുടെ ആദ്യ മന്ത്രിസഭാ യോഗത്തിൽ ഒപിഎസിന് അനുമതി നൽകിയത്.അതുപോലെ, കോൺഗ്രസ് പ്രതിജ്ഞാപത്രയിൽ വാഗ്ദാനം ചെയ്തിട്ടുള്ള മറ്റെല്ലാ ഉറപ്പുകളും മതിയായ സാമ്പത്തിക വ്യവസ്ഥകൾ ഉണ്ടാക്കിയ ശേഷം ഘട്ടം ഘട്ടമായി നിറവേറ്റുമെന്നും'' അദ്ദേഹം കൂട്ടിച്ചേര്‍ത്തു.
അദാനി കമ്പനിയും ട്രക്ക് ഓപ്പറേറ്റർ യൂണിയനുകളും തമ്മിലുള്ള സ്തംഭനാവസ്ഥ പരിഹരിക്കാൻ സർക്കാർ വളരെയധികം ശ്രദ്ധാലുവാണെന്നും ഇരു കക്ഷികളുമായും നിരവധി റൗണ്ട് ചർച്ചകൾ നടത്തിയിട്ടുണ്ടെന്നും സുഖ്‍വിന്ദര്‍ സിംഗ് കൂട്ടിച്ചേര്‍ത്തു. തർക്കം ഉടൻ പരിഹരിക്കപ്പെടുമെന്ന് ഞാൻ പ്രതീക്ഷിക്കുന്നു.ട്രക്ക് ഓപ്പറേറ്റർമാരുടെ അവകാശങ്ങൾക്കായി സർക്കാർ പോരാടുമെന്നും അവരുടെ ക്ഷേമത്തിനാണ് ഏറ്റവും മുൻഗണന നൽകുന്നതെന്നും സിംഗ് ചൂണ്ടിക്കാട്ടി.
Adjust Story Font
16
