രാജ്യത്ത് മഴക്കെടുതി രൂക്ഷം; വിവിധ സംസ്ഥാനങ്ങളിൽ കനത്ത മഴ

ഡൽഹി: രാജ്യത്തെ വിവിധ ഇടങ്ങളിൽ മഴക്കെടുതി രൂക്ഷം. ഗുജറാത്തിൽ വീട് തകര്‍ന്ന് 3 പേർ മരിച്ചു. ഡൽഹിയിലും, ഉത്തർപ്രദേശിലും ശക്തമായ മഴ തുടരുകയാണ്. ഗുജറാത്തിൽ അടുത്ത രണ്ടു ദിവസം കൂടി അതിശക്തമായ മഴ തുടരുമെന്നാണ് കേന്ദ്രം കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. സൗരാഷ്ട്ര, തെക്കന്‍ ഗുജറാത്ത് ജില്ലകളിലാണ് മ​ഴക്കെടുതി രൂക്ഷം.

അണക്കെട്ടുകള്‍ കവിഞ്ഞൊഴുകിയതിനാല്‍ താഴ്ന്ന പ്രദേശങ്ങള്‍ വെള്ളത്തിനടിയിലാണ്. ദ്വാരക ജില്ലയിൽ വീട് തകര്‍ന്നാണ് ഒരു കുടുംബത്തിലെ 3 പേര്‍ മരിച്ചത്. അഞ്ച് പേരെ രക്ഷപ്പെടുത്തി. ഗുജറാത്തിന് പുറമെ ഡൽഹി, ഉത്തർപ്രദേശ്, മുംബൈ എന്നിവിടങ്ങളിലും വ്യാപക മഴ തുടരുകയാണ്.

ഡൽഹിയിൽ ഓറഞ്ച് അലർട്ട് പ്രഖ്യാപിച്ചു. കനത്ത മഴയില്‍ പലയിടത്തും വെളളക്കെട്ട് രൂപപ്പെട്ടിട്ടുണ്ട്. അതിനിടെ മഹാരാഷ്ട്രയിലെ സംഗ്ലി ജില്ലയിൽ നേരിയ ഭൂചനം ഉണ്ടായി.