മണിപ്പൂരിലെ കലാപം വിരമിച്ച ഹൈക്കോടതി ചീഫ് ജസ്റ്റിസ് അന്വേഷിക്കും: അമിത് ഷാ

ഇംഫാല്‍: മണിപ്പൂരിലെ കലാപം വിരമിച്ച ഹൈക്കോടതി ചീഫ് ജസ്റ്റിസിന്‍റെ നേതൃത്വത്തിൽ അന്വേഷിക്കുമെന്ന് കേന്ദ്ര ആഭ്യന്തര മന്ത്രി അമിത് ഷാ. കലാപ ബാധിതർക്ക് പുനരധിവാസം ഉൾപ്പെടെയുള്ള സഹായങ്ങളും കേന്ദ്ര സർക്കാർ പ്രഖ്യാപിച്ചു. നാല് ദിവസത്തെ സന്ദർശനം പൂർത്തിയാക്കി അമിത് ഷാ ഇന്ന് മടങ്ങും.

കലാപം അവസാനിപ്പിക്കാൻ കുകി, മെയ്തെയ് വിഭാഗങ്ങൾ സഹകരിക്കണം എന്നാണ് അമിത് ഷായുടെ അഭ്യർത്ഥന. ഇരു വിഭാഗങ്ങളിലെ സംഘടനാ പ്രതിനിധികളുമായി കഴിഞ്ഞ മൂന്ന് ദിവസവും അമിത് ഷാ ചർച്ച നടത്തി. റിട്ടയെർഡ് ഹൈക്കോടതി ചീഫ് ജസ്റ്റിസിൻ്റെ നേതൃത്വത്തിൽ കലാപത്തെ കുറിച്ചും കലാപ ഗൂഢാലോചന സംബന്ധിച്ച 6 കേസുകൾ സി.ബി.ഐയും അന്വേഷിക്കും. സമാധാന ശ്രമങ്ങൾക്കായി ഗവർണറുടെ അധ്യക്ഷതയിൽ സമിതി രൂപീകരിക്കുമെന്നും ആഭ്യന്തര മന്ത്രി പറഞ്ഞു. ആയുധങ്ങൾ തിരിച്ചേൽപ്പിക്കാത്തവർക്ക് എതിരെ നടപടി സ്വീകരിക്കുമെന്നും അമിത് ഷാ മുന്നറിയിപ്പ് നൽകി.

കലാപത്തിൽ ജീവൻ നഷ്ടപ്പെട്ടവരുടെ കുടുംബത്തിന് നൽകുന്ന 10 ലക്ഷം രൂപ ധനസഹായത്തിൽ 5 ലക്ഷം രൂപ കേന്ദ്രം നൽകും. 30000 മെട്രിക് ടൺ അരിയും കലാപം ബാധിച്ചവർക്ക് അധികമായി കേന്ദ്രം നൽകും. സമാധാനം പുനസ്ഥാപിച്ചില്ലെങ്കിൽ ലഭിച്ച മെഡലുകൾ തിരിച്ചേൽപ്പിക്കുമെന്ന് പ്രഖ്യാപിച്ച മീരാഭായ് ചാനു ഉൾപ്പെടെയുള്ള കായിക താരങ്ങളുമായി ചർച്ച നടത്തിയ ശേഷമാണ് അമിത് ഷാ ഡൽഹിയിലേക്ക് മടങ്ങുക.

Summary- Union Home Minister Amit Shah said a judicial probe headed by a retired high court chief justice to inquire into clashes which erupted in the northeastern state of Manipur will soon be announced.