'ഖാർഗെ ജിയോട് ചോദിക്കൂ, എന്റെ റോൾ അദ്ദേഹം തീരുമാനിക്കും'; മാധ്യമങ്ങളോട് രാഹുൽ

ന്യൂഡൽഹി: കോൺഗ്രസിൽ തന്റെ റോൾ പുതിയ പ്രസിഡണ്ട് തീരുമാനിക്കുമെന്ന് പാർട്ടി നേതാവ് രാഹുൽ ഗാന്ധി. ഭാരത് ജോഡോ യാത്രയ്ക്കിടെ നടത്തിയ വാർത്താ സമ്മേളനത്തിൽ മാധ്യമങ്ങളോട് സംസാരിക്കുകയായിരുന്നു അദ്ദേഹം. ' കോൺഗ്രസ് അധ്യക്ഷൻ എന്റെ റോൾ തീരുമാനിക്കും. ഖാർഗെ-ജിയോട് ചോദിക്കൂ' - എന്നായിരുന്നു രാഹുലിന്റെ മറുപടി.

'കോൺഗ്രസ് പ്രസിഡണ്ടാണ് പാർട്ടിയിലെ ഏറ്റവും വലിയ അധികാര കേന്ദ്രം. എല്ലാ അംഗങ്ങളും പ്രസിഡണ്ടിന് റിപ്പോർട്ടു ചെയ്യണം. ഞാനും കോൺഗ്രസ് പ്രസിഡണ്ടിന് റിപ്പോർട്ടു ചെയ്യും.' - രാഹുൽ മാധ്യമങ്ങളോട് പറഞ്ഞു.

തെരഞ്ഞെടുപ്പ് കമ്മിഷനെ വച്ച് ഇലക്ഷൻ നടത്തുന്ന രാജ്യത്തെ ഏക രാഷ്ട്രീയപ്പാർട്ടിയാണ് കോൺഗ്രസെന്ന് രാഹുൽ ചൂണ്ടിക്കാട്ടി. 'ഞാൻ മിസ്ത്രിക്കൊപ്പം ജോലി ചെയ്തിട്ടുണ്ട്. അദ്ദേഹം നേരെ മാത്രം ചിന്തിക്കുന്നയാളാണ്. പ്രശ്‌നങ്ങൾ ഇലക്ഷൻ കമ്മിഷനിൽ റിപ്പോർട്ട് ചെയ്തിട്ടുണ്ട്. അവർ തീരുമാനം കൈക്കൊള്ളും' - അദ്ദേഹം കൂട്ടിച്ചേർത്തു.

ആന്ധ്രയിലെ കർണൂൽ ജില്ലയിൽനിന്നാണ് ഇന്ന് രാഹുലിന്റെ ഭാരത് ജോഡോ യാത്ര ആരംഭിച്ചത്.