ആരാണ് രാഹുൽ ഗാന്ധി? അറിയുമെങ്കിൽ പറഞ്ഞുതരൂ: അസദുദ്ദീൻ ഉവൈസി

കോൺഗ്രസ് നേതാവ് രാഹുൽ ഗാന്ധിക്കെതിരെ എഐഎംഐഎം നേതാവ് അസദുദ്ദീൻ ഉവൈസിയുടെ കടന്നാക്രമണം. കോൺഗ്രസ് തകർന്നടിയുമെന്ന് ഉവൈസി വിമർശിച്ചു. രാഹുൽ ഗാന്ധി ആരാണെന്ന് തനിക്ക് അറിയില്ലെന്നും അദ്ദേഹം പരിഹസിച്ചു. 'ആജ്തക് അജണ്ട' പരിപാടിയിൽ സംസാരിക്കുകയായിരുന്നു ഉവൈസി.

രാഹുൽ ഗാന്ധി ആരാണ്? എനിക്ക് അറിയില്ല. നിങ്ങൾക്ക് അറിയുമെങ്കിൽ പറഞ്ഞുതരൂ. എല്ലാ പാർട്ടികളുടെയും ബി ടീമായാണ് ഞങ്ങളെ ചിത്രീകരിക്കുന്നത്. നിങ്ങൾ ഇങ്ങോട്ട് രാഹുൽ ഗാന്ധിയെ ക്ഷണിച്ചാൽ ബിജെപിയുടെ അതേ ഭാഷയിൽ സംസാരിക്കുന്നത് കാണാം. അഖിലേഷ് യാദവിന്റെ സ്ഥിതിയും അതു തന്നെയാകും-ഉവൈസി കുറ്റപ്പെടുത്തി.

മറ്റു സംസ്ഥാനങ്ങളിൽ വേരുറപ്പിക്കാനുള്ള തൃണമൂൽ കോൺഗ്രസിന്റെ നീക്കത്തെക്കുറിച്ചും ഉവൈസി പ്രതികരിച്ചു. മറ്റു സംസ്ഥാനങ്ങളിലും മമത ബാനർജി പോരാട്ടം തുടരണമെന്ന് അദ്ദേഹം പറഞ്ഞു. ഇപ്പോൾ മമതയെ ബിജെപിയുടെ ബി ടീമെന്നാണ് കോൺഗ്രസ് വിളിക്കുന്നത്. ഗോവ തെരഞ്ഞെടുപ്പിൽ അവരുടെ പ്രകടനം കാണാൻ രസമുണ്ടാകും. അടുത്ത രണ്ടുമൂന്നു വർഷത്തിനകം കോൺഗ്രസ് പൊട്ടിത്തെറിക്കുന്നതുകാണാമെന്നും ഉവൈസി കൂട്ടിച്ചേർത്തു.

Summary: "Who is Rahul Gandhi? I don't know him. If you know who he is, please tell me," asks Asaduddin Owaisi