ഓടിക്കൊണ്ടിരുന്ന കാറിൽ ആറു മണിക്കൂറോളം യുവതിയെ കൂട്ടബലാത്സംഗത്തിനിരയാക്കി പാതയോരത്ത് തള്ളി; നാലുപേർ അറസ്റ്റിൽ

ബംഗളൂരു: യുവതിയെ തട്ടിക്കൊണ്ടുപോയി നാലംഗ സംഘം മണിക്കൂറുകളോളം ഓടിക്കൊണ്ടിരുന്ന കാറിൽ കൂട്ടബലാത്സംഗത്തിനിരയാക്കി. ആറു മണിക്കൂറോളം റോഡിലൂടെ കാറിൽ ചുറ്റിക്കറങ്ങിയ ശേഷം യുവതിയെ സംഘം പാതയോരത്ത് തള്ളി. ബംഗളൂരുവിൽ നടന്ന സംഭവത്തിൽ നാലുപേർ അറസ്റ്റിലായി.

മാർച്ച് 25ന് രാത്രി കോറമംഗലം പൊലീസ് സ്റ്റേഷൻ പരിധിയിലായിരുന്നു കേസിനാസ്പദമായ സംഭവം നടന്നത്. ബംഗളൂരുവിലെ നാഷനൽ ഗെയിംസ് വില്ലേജ് പാർക്കിൽ സുഹൃത്തിനൊപ്പം സിഗരറ്റ് വലിച്ചിരിക്കുകയായിരുന്നു യുവതി. സർക്കാർ ഓഫിസുകൾ സ്ഥിതിചെയ്യുന്ന മേഖലയായിരുന്നു ഇത്. പെൺകുട്ടി സിഗരറ്റ് വലിക്കുന്നത് കണ്ട് ഒരാൾ വന്ന് ആദ്യം ചോദ്യംചെയ്യുകയും ഭീഷണിപ്പെടുത്തുകയുമായിരുന്നു.

പിന്നീട് മൂന്നുപേരുമായെത്തിയ ഇയാൾ പെൺകുട്ടിയെ ബലം പ്രയോഗിച്ച് കാറിലേക്ക് വലിച്ചുകയറ്റി. തുടർന്ന് ഇന്ദിരാ നഗർ, ദൊമാലൂർ, അനേകൽ, നൈസ് റോഡ് എന്നീ സ്ഥലങ്ങളിലൂടെ കാറിൽ ചുറ്റിക്കറങ്ങിയാണ് യുവതിയെ ലൈംഗികമായി പീഡിപ്പിച്ചത്. ഒടുവിൽ പുലർച്ചെ നാലു മണിയോടെ പെൺകുട്ടിയുടെ വീടിനടുത്തുള്ള പാതയോരത്ത് തള്ളി സംഘം കടന്നുകളയുകയായിരുന്നുവെന്ന് സൗത്ത്-ഈസ്റ്റ് ഡി.സി.പി സി.കെ ബാബ പറഞ്ഞു.

തൊട്ടടുത്ത ദിവസം പൊലീസ് സ്റ്റേഷനിലെത്തി യുവതി പരാതി നൽകിയതിന്റെ അടിസ്ഥാനത്തിലാണ് കേസ് രജിസ്റ്റർ ചെയ്ത് അന്വേഷണം ആരംഭിച്ചത്. പ്രതികളായ നാലുപേരെയും അറസ്റ്റ് ചെയ്തതായി പൊലീസ് അറിയിച്ചു. ഇര ആശുപത്രിയിൽ ചികിത്സയിലാണ്. ഇവരുടെ മെഡിക്കൽ റിപ്പോർട്ട് ലഭിച്ചിട്ടില്ലെന്നും സംഭവത്തിൽ കൂടുതൽ അന്വേഷണം നടക്കുന്നുണ്ടെന്നും പൊലീസ് അറിയിച്ചു.

വിജയ്, ശ്രീധർ, കിരൺ, സതീഷ് എന്നിവരാണ് അറസ്റ്റിലായത്. 23, 24 വയസ് പ്രായക്കാരാണ് ഇവർ. പെൺകുട്ടി താമസിക്കുന്ന പരിസര പ്രദേശങ്ങളിലുള്ളവരാണ് പ്രതികളെല്ലാമെന്നാണ് പൊലീസ് പറയുന്നത്. ഇരയ്ക്ക് മുഖപരിചയമുള്ളവരാണ് എല്ലാവരും.

Summary: Woman gang-raped in moving car in Bengaluru for about six hours. Police arrested four men in the incident