ചലച്ചിത്ര താരം ജിഷ്ണു രാഘവന്‍ അന്തരിച്ചു

പ്രശസ്ത ചലച്ചിത്ര താരം ജിഷ്ണു രാഘവന്‍ അന്തരിച്ചു. അര്‍ബുദ രോഗത്തെതുടര്‍ന്ന് ഏറെക്കാലം ചികിത്സയിലായിരുന്നു

പ്രശസ്ത ചലച്ചിത്ര താരം ജിഷ്ണു രാഘവന്‍ അന്തരിച്ചു. അര്‍ബുദ രോഗത്തെതുടര്‍ന്ന് ഏറെക്കാലം ചികിത്സയിലായിരുന്നു അദ്ദേഹം. രാവിലെ 8.15 നായിരുന്നു അന്ത്യം. നടന്‍ രാഘവന്റെ മകനാണ്. 36 വയസ്സായിരുന്നു. നേരത്തെ തന്നെ അമൃത ആശുപത്രിയില്‍ ചികിത്സയിലായിരുന്നു. മാര്‍ച്ച് 22 ന് രോഗം കൂടി വീണ്ടും ആശുപത്രിയില്‍ ചികിത്സ തേടുകയായിരുന്നു. പുലര്‍ച്ഛയോടു കൂടി രോഗം മൂര്‍ച്ഛിക്കുകയും മരണം സംഭവിക്കുകയുമായിരുന്നു. മരണസമയത്ത് അച്ഛനുമമ്മയും സുഹൃത്തും കൂടെയുണ്ടായിരുന്നു.

അച്ഛന്‍ സംവിധാനം ചെയ്ത കിളിപ്പാട്ട് എന്ന സിനിമയിലൂടെ 1987 ല്‍ ബാലനടനായാണ് ജിഷ്ണു മലയാള സിനിമാരംഗത്തേക്ക് പ്രവേശിക്കുന്നത്. പിന്നീട് സംവിധായകന്‍ കമലിന്റെ നമ്മള്‍ എന്ന ചിത്രത്തിലൂടെയാണ് അഭിനയരംഗത്ത് സജീവമായി. റെബേക്ക ഉതുപ്പ് കിഴക്കേമലയാണ് അവസാനം അഭിനയിച്ച ചിത്രം. നേരറിയാന്‍ സിബിഐ, ചക്കരമുത്ത്, ഓര്‍ഡിനറി, നിദ്ര തുടങ്ങി നിരവധി ചിത്രങ്ങളിൽ അഭിനയിച്ചിട്ടുണ്ട്. ട്രാഫികിന്റെ ബോളിവുഡ് റീമേക്കിലും ജിഷ്ണു അഭിനയിച്ചിട്ടുണ്ട്. നായകനായാലും പ്രതിനായകനായാലും തനിക്ക് ലഭിച്ച് വേഷത്തെ ജിഷ്ണു തന്മയത്വത്തോടെ അവതരിപ്പിച്ചു.

അസുഖ വിവരം വളരെ പോസീറ്റീവായി പങ്കുവെച്ച് ഫേസ്ബുക്കില്‍ അടുത്ത ദിവസം വരെ സജീവമായിരുന്നു ജിഷ്ണു.