നടിക്കെതിരായ അതിക്രമം: മുഴുവന്‍ പ്രതികളെയും തിരിച്ചറിഞ്ഞെന്ന് പൊലീസ്

അറസ്റ്റിലായ ഡ്രൈവര്‍ മാര്‍ട്ടിനില്‍ നിന്നും ലഭിച്ച വിവരങ്ങളുടെ അടിസ്ഥാനത്തിലാണ് അന്വേഷണം

കൊച്ചിയില്‍ നടിയെ ആക്രമിച്ച എല്ലാ പ്രതികളേയും തിരിച്ചറിഞ്ഞതായി പൊലീസ്. നിലവിൽ മൂന്ന് പേരെ പൊലീസ് കസ്റ്റഡിയിൽ എടുത്തിട്ടുണ്ട്. പ്രധാന പ്രതി പൾസർ സുനിയ്ക്കായി പോലീസ് തിരച്ചിൽ ഊർജ്ജിതമാക്കി. എഡിജിപി ബി.സന്ധ്യ അടക്കമുള്ള ഉന്നത ഉദ്യോഗസ്ഥർ കൊച്ചിയിൽ എത്തി.

ആദ്യം പിടിയിലായ മാർട്ടിനെ ചോദ്യം ചെയ്തതിൽ നിന്നാണ് പ്രതികളെ കുറിച്ചുള്ള ഏകദേശ ധാരണ പൊലീസിന് ലഭിച്ചത്. പിന്നാലെ റൂറൽ എസ് പിയുടെ നേതൃത്വത്തിലുള്ള സംഘം കൊയമ്പത്തൂരിൽ നിന്ന് രണ്ട് പേരെ കൂടി അറസ്റ്റ് ചെയ്തു. ഇവരെ ചോദ്യം ചെയ്തപ്പോഴാണ് പ്രതികളെ കുറിച്ചുള്ള വ്യക്തമായ വിവരം ലഭിച്ചത്. പൊലീസ് നല്‍കുന്ന സൂചനയനുസരിച്ച് പൾസർ സുനി, വടിവാൾ സലീം, മാർട്ടിൻ, വിജേഷ്, മണികണ്ഠൻ, മനു, പ്രദീപ് എന്നിവരാണ് സംഘത്തിലുള്ളത്. ഇതിൽ വടിവാൾ സലീം, മനു എന്നിവരാണ് കൊയമ്പത്തൂരിൽ നിന്നും പിടിയിലായത്. ഇവരെ രഹസ്യ കേന്ദ്രത്തിൽ ചോദ്യം ചെയ്ത് വരുകയാണ്.

അതേസമയം എഡിജിപി ബി സസ്യയുടെ നേതൃത്വത്തിൽ ആലുവ ക്ലബിൽ അന്വേഷണ ഉദ്യോഗസ്ഥർ യോഗം ചേർന്നു. സംഭവത്തിന്റെ എല്ലാ വശങ്ങളും പരിശോധിക്കാൻ അന്വേഷണ സംഘം തീരുമാനിച്ചു.

പ്രതികൾ സഞ്ചരിച്ച വാഹനം ഫോറന്‍സിക്ക് വിഭാഗം പരിശോധന നടത്തി. പ്രതികൾ ഉപയോഗിച്ച വസ്ത്രങ്ങൾ വാഹനത്തിൽ നിന്നും ലഭിച്ചു. വാഹനത്തിന്റെ നമ്പരും വ്യാജമാണെന്ന് കണ്ടെത്തി. ബാക്കിയുള്ള പ്രതികളെ പിടിക്കാൻ സിറ്റി പോലീസ് കമ്മീഷണറുടെ നേതൃത്വത്തിൽ സുഹൃത്തുകളേയും ബന്ധുക്കളേയും ചോദ്യംചെയ്ത് വരികയാണ്.