മാത്യു ടി തോമസിനെ മന്ത്രി സ്ഥാനത്തുനിന്ന് മാറ്റിയേക്കും

മന്ത്രി സ്ഥാനത്തെച്ചൊല്ലി ജെഡിഎസ് സംസ്ഥാന നേതൃത്വത്തിലുണ്ടായ തര്‍ക്കത്തില്‍ കേന്ദ്രനേതൃത്വം ഇടപെടുന്നു. കേന്ദ്ര തീരുമാനം അഗീകരിക്കാന്‍ എല്ലാവരും ബാധ്യസ്ഥരാണെന്ന് അധ്യക്ഷന്‍ എച്ച് ഡി ദേവഗൌഡ പറഞ്ഞു. മാത്യു ടി തോമസിനെ ഡല്‍ഹിയിലേക്ക് വിളിപ്പിച്ച് കൂടിക്കാഴ്ചക്ക് നടത്തിയ ശേഷമായിരുന്നു പ്രതികരണം. മാത്യു ടി തോമസിനെ മന്ത്രി സ്ഥാനത്തുനിന്ന് മാറ്റിയേക്കുമെന്നും സൂചനയുണ്ട്.

മന്ത്രിസ്ഥാനത്തു നിന്ന് മാത്യു ടി തോമസിനെ മാറ്റണമെന്ന ആവശ്യം സംസ്ഥാന അധ്യക്ഷന്‍ കെ കൃഷ്ണന്‍ കുട്ടിയും അദ്ദേഹത്തോട് ചേര്‍ന്നു നില്‍ക്കുന്നവരും കേന്ദ്രത്തോട് ആവര്‍ത്തിച്ച് ആവശ്യപ്പെട്ടിരുന്നു. കഴിഞ്ഞ ദിവസങ്ങളില്‍ സംസ്ഥാന നേതാക്കളില്‍ പലരും ദേശീയ അധ്യക്ഷന്‍ എച്ച് ഡി ദേവഗൌഡയെ നേരിട്ട് കണ്ടും പരാതി ഉന്നയിച്ചു. ഈ പശ്ചാതലത്തിലാണ് ദേവഗൌഡ, മാത്യു ടി തോമസിനെ ഡല്‍ഹിയിലേക്ക് വിളിപ്പിച്ച് കൂടിക്കാഴ്ച നടത്തിയത്. കേന്ദ്ര തീരുമാനം അഗീകരിക്കാന്‍ എല്ലാവരും ബാധ്യസ്ഥരാണെന്ന് അധ്യക്ഷന്‍ എച്ച് ഡി ദേവഗൌഡ പറഞ്ഞു. കേന്ദ്ര തീരുമാനം എന്തായാലും അംഗീകരിക്കുമെന്ന് മാത്യു ടി തോമസും പ്രതികരിച്ചു.

മാത്യു ടി തോമസിന്റെ മന്ത്രിപദത്തിലെ പ്രകടനം മോശമാണ്, മന്ത്രിയാകാത്ത മുതിര്‍ന്ന നേതാവ് കെ കൃഷ്ണന്‍ കുട്ടിക്ക് മന്ത്രിപദം നല്‍കണം, 2 വര്‍ഷത്തിന് ശേഷം മന്ത്രിപദം ഒഴിയുമെന്ന ധാരണയുണ്ടായിരുന്നു എന്നീ ആരോപണങ്ങളാണ് കൃഷ്ണന്‍കുട്ടി വിഭാഗം ഉന്നയിക്കുന്നത്. ഇക്കാര്യത്തില്‍ സംസ്ഥാന കൌണ്‍സില്‍, എക്സിക്യൂട്ടിവ് യോഗങ്ങള്‍ക്ക് ശേഷം ദേശീയ സെക്രട്ടറി ജനറല്‍ ഡാനിഷ് അലി നല്‍കിയ റിപ്പോര്‍ട്ടും മുന്നണിയെയും സര്‍ക്കാരിനെയും നയിക്കുന്ന സിപിഎം നിലപാടും പരിഗണിച്ചായിരിക്കും കേന്ദ്രം അന്തിമ തീരുമാനമെടുക്കുക. പ്രശ്ന പരിഹാരത്തിനായി ഭൂരിപക്ഷാഭിപ്രായം പരിഗണിച്ച് മാത്യു ടി തോമസിനെ മന്ത്രി സ്ഥാനത്തുനിന്ന് മാറ്റാനുള്ള സാധ്യതയുമുണ്ട്.