കോട്ടയം പാണ്ടൻചിറയിൽ ഓടിക്കൊണ്ടിരുന്ന കാറിന് തീപിടിച്ചു; ഒരാൾക്ക് ഗുരുതര പരിക്ക്

കോട്ടയം: കോട്ടയം പാണ്ടൻചിറയിൽ ഓടിക്കൊണ്ടിരുന്ന കാറിന് തീപിടിച്ച് അപകടം. മുണ്ടക്കയം ചോറ്റി സ്വദേശി വാകത്താനം പാണ്ടൻചിറ ഓട്ടക്കുന്ന് വീട്ടിൽ സാബുവിന് ഗുരുതര പരിക്കേറ്റു. ഇന്ന് രാവിലെ യാത്രകഴിഞ്ഞു വീടിനു സമീപമെത്തിയപ്പോൾ വലിയ ശബ്ദത്തോടെ കാറിന് തീപിടിക്കുകയായിരുന്നു.

വീടിന്റെ എകദേശം 20 മീറ്റർ അകലെയാണ് അപകടമുണ്ടായത്. കാറിൽ സാബു മാത്രമെ ഉണ്ടായിരുന്നുള്ളു. അപകടത്തിന്റെ കാരണം വ്യക്തമല്ല. ചങ്ങനാശേരിയിൽ നിന്നെത്തിയ അഗ്നി ശമന സേന തീയണച്ച് സാബുവിനെ പുറത്തെടുക്കുകയായിരുന്നു. ഗുരുതരമായി പൊള്ളലേറ്റ ഇയാൾ ചങ്ങനശേരിയിലെ സ്വകാര്യ ആശുപത്രിയിൽ ചികിത്സയിലാണ്.