മൂന്നാറിൽ വീടിനു മുകളിലേക്ക് മണ്ണിടിഞ്ഞ് വീണു; ഒരു മരണം

ഇടുക്കി: മൂന്നാറിൽ വീടിനു മുകളിലേക്ക് മണ്ണിടിഞ്ഞു വീണ് ഒരു മരണം. മൂന്നാർ സ്വദേശി കുമാറിന്റെ വീട്ടിലേക്കാണ് മണ്ണിടിഞ്ഞ് വീണത്. കുമാറിന്റെ ഭാര്യ മാലയാണ് മരിച്ചത്. ഉച്ച മുതൽ പ്രദേശത്ത് ശക്തമായ മഴയാണുള്ളത്. മറ്റാരും മണ്ണിനടിയിൽ ഏർപ്പെട്ടിട്ടില്ല.

വീടിന്റെ പിൻഭാ​ഗത്താണ് മണ്ണിടിഞ്ഞുവീണത്. മകൻ വീടിനുപുറത്തേക്ക് ഓടിയതിനാൽ രക്ഷപ്പെടുകയായിരുന്നു. മണിക്കൂറുകൾ നീണ്ട പരിശ്രമത്തിനൊടുവിൽ പൊലീസും അ​ഗ്നിശമന സേനയും നാട്ടുകാരും ചേർന്നാണ് മണ്ണ് നീക്കം ചെയ്തതും മാലയെ പുറത്തെത്തിച്ചതും. ഉടൻ തന്നെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.

കനത്ത മഴ തുടരുന്ന സാഹചര്യത്തിൽ ജില്ലയിൽ രാത്രി യാത്രക്ക് നിരോധനം ഏർപ്പെടുത്തി.