തൃശൂരില്‍ കൊടി തോരണത്തിന്‍റെ കയർ കഴുത്തിൽ കുരുങ്ങി അഭിഭാഷകയ്ക്ക് പരിക്ക്

തൃശൂര്‍: തൃശൂർ അയ്യന്തോളിൽ കൊടി തോരണത്തിന്‍റെ കയർ കഴുത്തിൽ കുരുങ്ങി സ്കൂട്ടർ യാത്രികയായ അഭിഭാഷകക്ക്‌ പരിക്കേറ്റു. കിസാൻ സഭയുടെ ദേശീയ സമ്മേളനത്തിനായി സ്ഥാപിച്ച കൊടി തോരണമാണ് പൊട്ടി വീണത് .

തൃശൂർ കേച്ചേരി സ്വദേശിയായ അഭിഭാഷക കുക്കു ദേവകി സ്കൂട്ടറിൽ യാത്ര ചെയ്യുമ്പോഴാണ് കഴുത്തിൽ തോരണം കുടുങ്ങിയത്. വേഗം കുറവായതിനാൽ വാഹനം പെട്ടെന്ന് നിർത്താൻ കഴിഞ്ഞു. അതിനാൽ വലിയ അപകടം ഒഴിവായി. എന്നാൽ കഴുത്തിന് പരിക്കേറ്റു . ഇന്നലെ ഉച്ചയോടെയായിരുന്നു അപകടം. തോരണം അഴിക്കാത്തതിന് എതിരെ കലക്ടർക്കും പൊലിസിനും കുക്കു പരാതി നൽകി . കിസാൻ സഭ ദേശീയ സമ്മേളനം കഴിഞ്ഞ ദിവസമാണ് തൃശൂരിൽ സമാപിച്ചത്. സമ്മേളനം കഴിഞ്ഞിട്ടും കൊടി തോരണങ്ങൾ അഴിച്ചുമാറ്റിയിരുന്നില്ല.