കൈക്കോടാലി കൊണ്ട് വാഹനത്തിന്റെ ചില്ല് തകർത്തു; ആലപ്പുഴയിൽ ശബരിമല തീർഥാടക സംഘത്തിന് നേരെ ആക്രമണം

ആലപ്പുഴ: കളർകോട് ശബരിമല തീർഥാടക സംഘത്തിന്റെ വാഹനത്തിന് നേരെ ആക്രമണം. മലപ്പുറം സ്വദേശികൾ സഞ്ചരിച്ച വാഹനത്തിന്റെ ചില്ല് അടിച്ചുതകർത്തു. തീർഥാടക സംഘത്തിലുണ്ടായിരുന്ന ഒമ്പതുവയസുകാരിക്ക് പരിക്കേറ്റു. കുട്ടിയുടെ കൈക്കാണ് പരിക്കേറ്റത്. ഇന്നലെ രാത്രി പത്തുമണിയോടുകൂടിയാണ് സംഭവം.

ആക്രമണത്തിന്റെ ദൃശ്യങ്ങളിൽ പ്രതിയുടെ മുഖം വ്യക്തമായി കാണാം. ഇയാളെ തിരിച്ചറിഞ്ഞതായി ആലപ്പുഴ സൗത്ത് പൊലീസ് പറഞ്ഞു. കളർകോടിന് സമീപം ഭക്ഷണം കഴിക്കാനായി വാഹനം നിർത്തിയതായിരുന്നു തീർഥാടക സംഘം. ഇതിനിടെ സംഘത്തിലുണ്ടായിരുന്ന ഒമ്പതുവയസുകാരിയായ പെൺകുട്ടി ഒരു ബൈക്കിൽ ചാരി നിന്നു.

പിന്നീട് ബൈക്കുടമ എത്തി കുട്ടിയോട് മാറി നിൽക്കാൻ ആവശ്യപ്പെടുകയും ഒപ്പമുണ്ടായിരുന്ന ആളോട് തർക്കിക്കുകയുമായിരുന്നു. അതിനിടെ ഇയാൾ കുട്ടിയെ പെൺകുട്ടിയെ ബലമായി പിടിച്ചുമാറ്റി. അങ്ങനെയാണ് കുട്ടിയുടെ കൈക്ക് പരിക്കേറ്റത്. ഇതേതുടർന്ന് ഇയാൾ സംഘത്തിലെ മറ്റുള്ളവരുമായി വാക്കേറ്റമുണ്ടാവുകയും കയ്യിൽ കരുതിയിരുന്ന കൈ കോടാലി ഉപയോഗിച്ച് വാഹനത്തിന്റെ ചില്ല് അടിച്ചുതകർത്തു. സംഭവത്തില്‍ ഇരവുകാട് സ്വദേശി വിഷ്ണുവാണ് പ്രതിയെന്ന് പൊലീസ് പറഞ്ഞു. ഇയാള്‍ ഒളിവിലാണ്. ഇയാള്‍ക്കായി തിരച്ചില്‍ ഊര്‍ജ്ജിതമാക്കിയതായി ആലപ്പുഴ സൗത്ത് പൊലീസ് വ്യക്തമാക്കി.