'ബി.ജെ. പി അധികാരത്തിലെത്തിയാലും യോഗി തിരിച്ചുവരില്ല'; കേരളത്തിൽ പുസ്തകം പ്രകാശനം ചെയ്ത് ഡോ.കഫീൽഖാൻ

ഉത്തർപ്രദേശിൽ ​ബി.ജെ. പി അധികാരത്തിലെത്തിയാലും യോഗി ആദിത്യനാഥ്​ തിരിച്ചുവരില്ലെന്ന്​ ഡോ.കഫീൽഖാൻ. സുരക്ഷിതമായ സീറ്റ് തേടുകയാണ് യോഗിയെന്നും കഫീൽ ഖാൻ പറഞ്ഞു. കോഴിക്കോട് നടന്ന 'ഡോ. കഫീൽഖാൻറെ ദി ഖൊരക്​പൂർ ഹോസ്പിറ്റൽ ​ട്രാജഡി'എന്ന പുസ്തകത്തിൻറെ പ്രകാശന വേദിയിൽ സംസാരിക്കുകയായിരുന്നു.

ഉത്തർപ്രദേശിലെ ഖൊരക്പൂർ ആശുപത്രിയിൽ ഓക്സിജൻ ലഭിക്കാതെ മരിച്ച കുട്ടികളുടെയും കുടുംബത്തിൻറെയും അവസ്ഥ തുറന്ന് കാണിക്കുന്നതാണ് കഫീൽഖാൻറെ ദി ഖൊരക്​പൂർ ഹോസ്പിറ്റൽ ​ട്രാജഡി എന്ന പുസ്തകം. സത്യം തുറന്ന് കിട്ടിയതിൻറെ പേരിൽ ജയിലിൽ അനുഭവിക്കേണ്ടി വന്ന പീഡനവും കഫീൽ ഖാൻ പുസ്തകത്തിൽ വിവരിക്കുന്നുണ്ട്​. ഹൈ​ക്കോടതിയും സുപ്രീംകോടതിയും കുറ്റക്കാരനല്ലെന്ന്​ കണ്ടെത്തിയിട്ടും ഇ​പ്പോഴും തന്നെ ജോലിയിൽ തിരിച്ചെടുത്തിട്ടില്ലെന്ന് കഫീൽഖാൻ പറഞ്ഞു.

ഈ പുസ്തകം എൻ്റെ കാര്യം മാത്രമല്ല പറയുന്നത്, 63 കുടുംബങ്ങളുടെതാണ്. നീതി കാത്തിരിക്കുന്ന കുടുംബങ്ങളുടെ അവസ്ഥയാണ്. അദ്ദേഹം പറഞ്ഞു. പുസ്തകം മലയാളത്തിലുൾപടെ മറ്റ്​ ഭാഷകളിലും വൈകാതെ പുറത്തിറങ്ങുമെന്നും കഫീൽ ഖാൻ പറഞ്ഞു.

എം.കെ. രാഘവൻ എം. പി, ഡോ. എം.കെ. മുനീർ എം.എൽ.എ എന്നിവർ ചടങ്ങിൽ പങ്കെടുത്തു. സോളിഡാരിറ്റി യൂത്ത്​ മൂവ്​മെന്‍റ്​ സംസ്ഥാനപ്രസിഡന്‍റ്​ നഹാസ്​ മാള അധ്യക്ഷനായിരുന്നു.