പുക ഉയർന്നതോടെ യാത്രക്കാർ ഇറങ്ങിയോടി; പെരുമ്പാവൂരിൽ നടുറോഡിൽ കാർ കത്തിനശിച്ചു

കൊച്ചി: പെരുമ്പാവൂരിൽ ഓടിക്കൊണ്ടിരുന്ന കാർ കത്തി നശിച്ചു. പെരുമ്പാവൂർ- ആലുവ- മൂന്നാർ റോഡിൽ ഇന്ന് രാവിലെ 9 മണിയോടെ ആയിരുന്നു അപകടം. കുറുപ്പുംപടി മുടിക്കരായി സ്വദേശി ജോർജിന്റെ അംബാസഡർ കാറിനാണ് തീപിടിച്ചത്.

കാറിൽ നിന്ന് പുക ഉയർന്നത് കണ്ട ഉടനെ ജോർജും കുടുംബവും പുറത്തിറങ്ങിയിരുന്നു. ഇവരിറങ്ങി അൽപസമയത്തിനുള്ള കാറിനുള്ളിൽ തീ പടർന്നു. തീ അണച്ചപ്പോഴേക്കും കാർ കത്തി നശിച്ചു. ഫയർഫോഴ്‌സ് എത്തിയാണ് തീ നിയന്ത്രണവിധേയമാക്കിയത്. പ്രധാന റോഡായതിനാൽ ഫയർഫോഴ്‌സ് എത്തുന്നത് വരെ ഗതാഗതക്കുരുക്കുമുണ്ടായി.