സ്വര്‍ണമോ പണമോ ചോദിച്ചില്ല, അവള്‍ക്ക് താങ്ങായി ഞാനുണ്ട്; വിപിന്‍റെ സഹോദരിയെ ചേര്‍ത്തുപിടിച്ച് നിധിന്‍
അവളെ ഞാന്‍ ഇഷ്ടപ്പെട്ടത് പണം മോഹിച്ചല്ല. വിദേശത്തുള്ള ജോലി പോയാലും പ്രശ്‌നമില്ല
സഹോദരിയുടെ വിവാഹം മുടങ്ങുമോ എന്ന ആശങ്കയില്‍ സ്വയം ജീവനൊടുക്കിയ വിപിന്‍ എല്ലാവരെയും കണ്ണീരിലാഴ്ത്തിയിരുന്നു. വിപിന്‍റെ മരണം തീര്‍ത്ത ഞെട്ടലില്‍ ഹൃദയം നുറുങ്ങുന്ന വേദനയിലാണ് അമ്മയും സഹോദരിയും. തകര്‍ന്നുനില്‍ക്കുന്ന വിദ്യക്ക് താങ്ങായി താനുണ്ടാകുമെന്ന് പറയുകയാണ് പ്രതിശ്രുതവരന്‍ നിധിന്‍.
അവളെ ഞാന്‍ ഇഷ്ടപ്പെട്ടത് പണം മോഹിച്ചല്ല. വിദേശത്തുള്ള ജോലി പോയാലും പ്രശ്‌നമില്ല. വിദ്യയെ വിവാഹം ചെയ്തതിന് ശേഷമേ മടങ്ങി പോകുന്നുള്ളു. ജനുവരി ആദ്യ ആഴ്ചയില്‍ തിരിച്ചെത്തണം എന്നാണ് കമ്പനി അറിയിച്ചിരിക്കുന്നത്. എന്നാല്‍ 41 ചടങ്ങ് കഴിഞ്ഞ് വിവാഹം നടത്തിയതിന് ശേഷമേ മടക്കമുള്ളു. അച്ഛനില്ലാത്ത കുട്ടിയാണ്. ഇപ്പോള്‍ ആങ്ങളയുമില്ല. ഇനി അവള്‍ക്ക് ഞാനുണ്ട് എല്ലാമായി... നിധിന്‍ പറഞ്ഞു.
രണ്ടര വര്‍ഷമായി നിധിനും വിപിന്‍റെ സഹോദരി വിദ്യയും പ്രണയത്തിലാണ്. ഷാര്‍ജയില്‍ എസി മെക്കാനിക്ക് ആണ് നിധിന്‍. രണ്ടാഴ്ച മുന്‍പാണ് നാട്ടില്‍ എത്തിയത്. പണവും സ്വര്‍ണവും ഒന്നും വേണ്ടെന്ന് പറഞ്ഞെങ്കിലും ബാങ്കില്‍ നിന്ന് വായ്പ ശരിയായിട്ടുണ്ടെന്നും പെങ്ങളെ വെറുംകയ്യോടെ വിടാനാകില്ലെന്നുമാണ് വിപിന്‍ പറഞ്ഞത്. ഫോട്ടോയെടുക്കാനായി വരാന്‍ തിങ്കളാഴ്ച നിധിനോട് വിപിന്‍ പറഞ്ഞിരുന്നു. സ്റ്റുഡിയോയില്‍ പോയി ഫോട്ടോ എടുത്തു. അതിന് ശേഷം വിദ്യയെ ജ്വല്ലറിയില്‍ എത്തിക്കാന്‍ വിപിന്‍ പറഞ്ഞു. വിദ്യയെ അമ്മയ്‌ക്കൊപ്പം ജ്വല്ലറിയിലാക്കി നിധിന്‍ കയ്പമംഗലത്തെ വീട്ടിലേക്ക് മടങ്ങി.
എന്നാല്‍ ബാങ്കില്‍ നിന്ന് പണം വാങ്ങി വരാമെന്ന് പറഞ്ഞ വിപിന്‍ മടങ്ങി വരാതിരുന്നതോടെ നിധിനെ വിദ്യ വിളിച്ചു. വിപിനെ നിധിന്‍ വിളിച്ചിട്ടും എടുത്തില്ല. ഇതോടെ നിധിന്‍ വിദ്യയുടെ വീട്ടിലേക്ക് എത്തി. എന്നാല്‍ വിപിന്‍ ആത്മഹത്യ ചെയ്‌തെന്ന വിവരമാണ് അറിഞ്ഞത്. വിപിന്‍റെ കുടുംബത്തെ സഹായിക്കാന്‍ നിരവധി സംഘടനകള്‍ രംഗത്തെത്തി. മജ്ലിസ് ചാരിറ്റബിള്‍ ട്രസ്റ്റ് ഇന്നലെ ഒന്നര ലക്ഷം രൂപയുടെ ചെക്കാണ് വീട്ടിലെത്തി കൈമാറിയത്. ചെമ്പൂക്കാവ് സേക്രഡ് ഹാര്‍ട്ട് ഇടവക 25,000 രൂപയും വാഗ്ദാനം ചെയ്തു. രണ്ട് സ്വര്‍ണവ്യാപാര സ്ഥാപനങ്ങളും ആഭരണങ്ങള്‍ വാഗ്ദാനം ചെയ്തിട്ടുണ്ട്.
Adjust Story Font
16
