'വാഹനത്തിൽ സ്ഥലമില്ലായിരുന്നു'; പ്രധാനമന്ത്രിയുടെ റോഡ് ഷോയിൽനിന്ന് ഒഴിവാക്കിയതിൽ ഡോ. അബ്ദുസ്സലാം

മലപ്പുറം: പ്രധാനമന്ത്രി നരേന്ദ്ര മോദിയുടെ റോഡ് ഷോയിൽനിന്ന് തന്നെ ഒഴിവാക്കിയത് വാഹനത്തിൽ സ്ഥലമില്ലാത്തതുകൊണ്ടാണെന്ന് മലപ്പുറത്തെ ബി.ജെ.പി സ്ഥാനാർഥി ഡോ. എം. അബ്ദുസ്സലാം. പൊന്നാനിയിലെ സ്ഥാനാർഥി നിവേദിത താൻ സ്ഥാനാർഥിയാണെന്ന് എസ്.പി.ജിയോട് പറഞ്ഞു. എന്നാൽ വാഹനത്തിൽ കയറേണ്ടവരുടെ ലിസ്റ്റിൽ തന്റെ പേരില്ലായിരുന്നു. മുസ്‌ലിം പേരുള്ളതിനാൽ തന്നെ ഒഴിവാക്കിയതായി കരുതുന്നില്ലെന്നും അദ്ദേഹം മീഡിയവണിനോട് പറഞ്ഞു.

ഇപ്പോൾ വരുന്ന വാർത്തകൾ മാധ്യമങ്ങൾ ഉണ്ടാക്കുന്നതാണ്. താൻ പാലക്കാട് പോയത് റോഡ് ഷോയിൽ പങ്കെടുക്കാനല്ല. മോദിയെ കാണാനും മലപ്പുറത്തേക്ക് ക്ഷണിക്കാനുമാണ് പോയത്. താൻ മലപ്പുറത്തെ സ്ഥാനാർഥിയാണെന്ന് പറഞ്ഞപ്പോൾ 'ഗുഡ് ലക്ക്' പറഞ്ഞു. മലപ്പുറത്തേക്ക് ക്ഷണിച്ചപ്പോൾ ചിരിച്ചുകൊണ്ടാണ് പ്രതികരിച്ചതെന്നും അബ്ദുസ്സലാം പറഞ്ഞു.